Tshiṱori nga: Maanda Bele. Ṱhalutshedzo nga: Khathutshelo Raliphaswa.
Vhadzulapo vha kusi kwa Mapakophele, Nzhelele vho akhamadzwa nga u wanala ha zwitumbu zwa khotsia na vhana vhavho vhavhili. Zwitumbu izwo zwo wanala maḓakani a Mapakophele, zwa vhana zwo ladzwa tsini na khotsi vha tshi nembelela kha muri. Zwitumbu zwa vhana zwovha zwi na mbonzhe kha mivhili yavho. Hu humbulelwa uri khotsi avho vho vha vhulaha nga phanga vha sa athu u ḓi haṱula vhutshilo.
Zwitumbu izwo ndi zwa Thilivhali Mbulaheni, khotsi a vhana (41), Asakundwi Mbulaheni (7) na Uhone Mbulaheni (4)
Muambeli wa mapholisa a Vhembe, muofisiri Vho Vuledzani Dathi, vhari mapholisa vhori vha tshi founelwa nga matsheloni a awara ya vhurathi vha ya he tshiwo tsha bvelela hone. Vhori vha tshi swika vha dzhia phanga ye vha humbulelwa uri yo shuma u vhulaha vhana avho.
Vho Dathi vhari nga u lingedza u thivhela mavharivhari a uri munna avho na vhana vhavho vho tou vhulawa nga munwe muthu, ho vulwa milandu mivhili ya mabulayo na mulandu wa u sedzulusa uri tshiwo tsho vhangwa nga mini. "Ro lindela mvelele dza u ṱola uri vho lovha nga mini, zwine zwa ḓo ri bvisela khagala uri vho tou vhulawa kana vho tou ḓi haṱula naa. Tshivhangi tsha zwiito izwi a tshi athu u ḓivhiwa, hone mapholisa vha khou bvela phanḓa na tsedzuluso dzavho fhedzi ari koni u thudzela kule u tambudzana miṱani," vha amba.
Uya nga ane a ḓivha nga ha tshiwo itshi, vhari mme a vhana avho vha dzula kusini kwa Mapakophele, ngeno khotsi a vhana vhovha vha tshi dzula Tshituni na ṅwana wavho muthihi kha avho vhavhili. " Vho Mbulaheni na mufumakadzi wavho vho fhambana sa izwi Vho Mbulaheni vhovha vha tshi anzela u rwa mufumakadzi. Vho ḓa vha dzhia munwe ṅwana wavho nga mafhelo a vhege malapfu a vhege ya vhufa. Vho ḓou rumela mme a vhana mulaedza wa uri vha ṱoḓa u ḓi haṱula vhutshilo na vhana vhavho," vha amba.
Vho Lt Gen Thembi Hadebe vha khou kaidza vhadzulapo uri vha songo swikelela kha u dzhia kheo dza u ḓi haṱula matshilo musi vha tshi ṱangana na khaedu dzi konḓaho kha vhushaka havho na vhafunani vhavho. "Sa vunḓu ri khou u lwa na u tambudzwa ha vhathu miṱani, mabulayo ane a bvelela na zwiwo zwine vhabebi vha huvhadza vhana vhavho na u vha vhulaha, zwoṱhe izwi zwi ari lemela sa mapholisa. Vhadzulapo vha fanela u farana zwanḓa na rine uri ri lingedze u thivhela mabulayo," vha amba.