Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Khanedzano ya tshifhinga tshilapfu ya vhuhosi ngei Mvelaphanda Lwamondo vhuponi ha Vuwani yo dzhia vhuimo ha khakhathi musi murangaphanḓa wa sialala wapo, Khosi Vho Tikaninne Netshivhale, vha tshi ṱhaselwa nga nḓila i si yavhuḓi na u valelwa kha wadi ya tshipondwa ya vhuongelo hapo nga vhaṱhaseli vhanzhi.
Tshiwo itshi, tshe tsha sia murangaphanḓa wa mvelele vho huvhala vhukuma, tsho itea muvhunduni wa Dzwerani Mirenzheni nga Ḽavhuraru, ḽa 11 Fulwi, nga iri ya 19:00. Mafhungo a u ṱhaselwa ho thoma u phaḓalala nga matsheloni a tevhelaho, vhaṅwe vho thoma vha tshi amba uri muhulwane vho valelwa kha yuniti ya ṱhogomelo ya vhalwadze vhane vha ṱhoga ṱhogomelo khulwane.
Muambeli wa vhuhosi wa Netshivhale, Vho Peter Nthambeleni Nemakhavhani,vho khwathisedza tshiwo itshi fhedzi vha ri murangaphanda wa sialala a vhaho kha tshiimo tshi konḓaho kana tshi tatisaho. Vho ri: "Ee, vhovha vho huvhala vhukuma, fhedzi samusi ndi tshi khou amba, vho khwinisa vhukuma nahone vha khou kona u amba zwa zwino."
Vho Nemakhavhani vhari vho vha vho no vha Ṱhohoyanḓou musi vha tshi wana luṱingo nga ha u ṱhaselwa. "Ndo kundelwa u swika he zwa itea hone sa izwi ndovha ndi kule naho, fhedzi ndo pfa uri murangaphanḓa vho ṱhaselwa luvhi nahone vho dovha vha bvulwa zwiambaro nga muhumbulelwa ," vha ralo.
Uya nga ha Vho Nemakhavhani, vho vhudzwa uri vhe vha vha vhe hone fhethu he ha itea izwo vho ita nau tshuwiswa nga tshigidi nga muhumbulelwa. Ho dovha ha pomokwa uri muhumbulelwa muhulwane o dzhia dzi ṱhingokhwalwa dza murangaphanḓa na zwiambaro a ya tshiṱitshini tsha Mapholisa tsha Vuwani, he a lingedza u vula mulandu fhedzi a farwa nṱhani hazwo.
"Ri tenda nga maanḓa uri u ṱhaselwa ho vha hu tshi khou ṱuṱuwedzwa nga khanedzano ya mavu ya kale ine ra vha nayo na murangaphanḓa muhulwane wa mvelele wa Lwamondo, sa izwi ro pfa muhumbulelwa a tshi amba uri ndi ene muṋe wa Lwamondo yoṱhe. Hezwi a zwi ambiwi nahone zwi a thithisa vhukuma," vho ralo.
Vha Limpopo Mirror vho kwamana na nomboro ya luṱingo ya Khosi Netshivhale luvhili, nahone luṱingo lwo fhedza lwo fhindulwa nga mufumakadzi we a ḓiṱalusa sa mufumakadzi wawe.
"Murangaphanḓa vha kha ḓi vha kha tshiimo tshi si tshavhuḓi nahone vha nga si kone u fhindula dzifounu, fhedzi ndi nga khwaṱhisedza uri vha kha ḓi vha vhuongeloni nahone ro vula mulandu Tshiṱitshini tsha Mapholisa tsha Vuwani," vho ralo.
Muambeli wa Vhembe SAPS Vho W/O Vuledzani Dathi vho khwathisedza tshiwo itshi, vhari mulandu wa u lingedza u vhulaha wo vulwa.
"Ri nga khwaṱhisedza uri mapholisa a Vuwani vho fara munna wa miṅwaha ya 49 nga ṅwambo wa u lingedza u vhulaha, nga murahu ha musi munna wa miṅwaha ya 39 o wanala tshiṱaraṱani a sa koni u amba na u tshimbila, nga murahu ha musi hu tshi pfi o rwiwa lu vhavhaho nga muhumbulelwa na vhaṅwe miraḓo ya tshitshavha. Mupondwa, we a ṱalulwa sa Vho Tikaninne Ntambudzeni Netshivhale, vho huvhala zwi vhonalaho kha milenzhe yavho nahone vha iswa tshiimiswa tsha zwa ngalafho tshapo u itela dzilafho. Tsedzuluso dza mapholisa dzi khou bvela phanḓa," vho ralo.