Tshiṱori nga Maanda Bele. Ṱhalutshedzo nga Khathutshelo Raliphaswa.
Khudano ibvela phanda khantseḽara vhavhili vha dzangano la ANC nga tshifhinga tsha muṱangano wa davhi ngei Valdezia zwo vusa khuwelelo dza ndayo yo khwaṱhaho ya nga ngomu na u livhisa ṱhogomelo ntswa kha vhuthihi nga ngomu ha ḽihoro ḽivhusi.
Izwo ndi zwe zwa itea nga Mugivhela wa ḽa ṱhanu Lambamai, nga tshifhinga tsha muṱangano wa ANC Ward 31. Mukhantseḽara Vho Jeanet Matumba, vhe vha rumelwa lwa tshiofisi nga ofisi ya dzingu ya Vhembe u sedza maitele, hu pfi vho hanelwa u dzhena nga Vho Cllr Sipho Masuka, vhe vha vha mudzulatshidulo wa muṱangano. Ho mbo ḓi tevhela u ṱangana, hune Vho Matumba vha amba uri vho sukumedzwa nga nḓila i vhavhaho nahone vha dzhielwa luṱingo lwavho lwa luṱingothendeleki. Nga murahu vha vula mulandu wa u rwiwa nga Masuka.
Kha vidio ine ya khou leleda, Vho Masuka vho pfala vha tshiri vha nga si ṱoḓe Vho Matumba kha muṱangano ngauri vhovha sema kha khoro ya masipala. "No ḓa fhano u thithisa davhi ḽashu. No vha ni tshi khou nnyadza kha khantsele. No ḓa u itela mushumo waṋu," izwo ndi zwe vha amba kha iyo vidio. Vho engedza nga uri na vhone a vha ṱoḓi Mudzulatshidulo wa Masipala wa Makhado na tshimebi tshihulwane vha tshi ya muṱanganoni.
Vho Masuka nga murahu vho mbo ḓi farwa vha vhofhololwa nga khaidzo. U ḓivhonadza havho khothe, mathomoni ho dzudzanywa nga ḽa 8 Lambamai, ho fhiriselwa phanḓa kha ḽa 20 Lambamai. Musi vha tshi fhindula, vho vhea mulandu wa u vhaisa Vho Matumba vha re na mulandu. Vho Matumba vho vha vho dzudzanyelwa u ḓivhonadza khothe nga mulandu uyu nga Ḽavhuraru.
Muambeli wa ANC kha dzingu ḽa Vhembe, Vho Gumani Mukwevho, vho khwathisedza u rumelwa ha Matumba na u sasaladza u rwiwa hu no khou humbulelwa. "Dzingu ḽo ima ḽo khwaṱha kha khakhathi dzo thewaho kha mbeu. Zwe murado wa ANC Vho Masuka vha zwi ita - usukumedza murado muthihi wadzamgano, mufumakadzi - a zwi ṱanganedzei tshoṱhe," Vho Mukwevho vho ralo, vha engedza nga uri ḽihoro ḽo vha na vhuṱanzi ha u rumelwa ha tshiofisi ha Matumba.
Vho Mukwevho vho dovha vha bvisela khagala uri ANC yo thoma ṱhoḓisiso dza nga ngomu na uri maga a ndatiso a nga tevhela. Vho ri: "Ri ḓo ḓivhadza mawanwa nga tshifhinga tsho teaho." "Muṅwaleli wa dzingu vhovha vho no vhuya vha bvisa vhurifhi vhune ha khou ṱuṱuwedza miraḓo uri i litshe vhuḓifari vhu sa langei musi hu tshi khou itwa miṱangano."
Naho Vho Mukwevho vho hanedza uri hu na dzikhakhathi dzo phaḓalalaho vhukati ha vhakhantseḽara, vho tenda uri hu khou ṱoḓea maga a u fhaṱa tshigwada. "Ri tenda uri ofisi ya tshimebi tshihulwane i fanela u dzhenelela u itela u khwaṱhisa vhuthihi vhukati ha vhakhantseḽara vha ANC," vho engedza nga u ralo.