Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Khoro ya Mvelele ya Davhana yo vha i tshi khou vhuyedzedzwa nga khothe khathuli vhege mbili dzo fhiraho musi hu tshi ṋewa ndaela ya u ṱavhanya, ya vha thivhela u bvisa mikano na u rengisa mavu vha songo newa thendelo nga vhaṋe vha mabulasi.
Ndaela ya mulayo i bva kha u hanedzana vhukati ha murangaphanda wa sialala wapo, Vhamusanda Vho Frank Davhana, na Vho Mafungo Takalani Ramavhunga, nwana musadziavhane Vho Nyamukamadi Ramavhunga, vhe vha vha vhe na bulasi ya Doornspruit 41 tsini na vhupo ha Mpheni khala Elim.
Vho Ramavhunga vho pomoka Vho Davhana uri vha khou rengisa mavu a bulasini zwi siho mulayoni, vha tshi khou fhandekanya tshitshavha na u dzhiela fhasi vhaṋe vha mavu vha re mulayoni. Vho ṱalutshedza uri musi vha tshi khou dalela bulasi yavho, vho wana zwiṱitshi zwo vhalaho zwo vhewaho kha thundu yavho. Vho dovha vha ṱangana na vhathu vhane vha vha na vhuḓifhinduleli ha u ṋetshedza zwiṱitshi, vhe vha amba uri vha khou shuma nga ngomu ha pfanelo dzavho.
Muṅwe wa "vharengi" vha shango hu ambiwa uri ndi vhakhamphani ya dzibisi i ḓivheaho vhukuma ya Phadziri Brothers Enterprises, vhane zwi vhonala uri vho vha vho dzudzanya u thoma depo ya bisi henefho. Phadziri Brothers vho vha vho ṅwalwa sa muṅwe wa vhafhinduli kha mulandu uyu.
Vho Ramavhunga vhari vho pfa uri Vho Davhana vho ṋetshedza khumbelo ya mavu bulasini vho imela tshitshavha tshapo, fhedzi a hu na maṅwalo a fomalaho e a vha a tshi khou ṋewa vhone, nahone a vho ngo vhona nḓivhadzo ya uri mbilaelo i khou gazetwa.
"Ndo ṱangana na Vho Davhana kha ndaka yanga, he vha vha vho farakanea nga u ṋetshedza zwiṱitshi, u rema miri na u bvisa fhethu ho ṱahalaho. A vho ngo vhuya vha nkwama, sa muṋe wa bulasi, kha nyambedzano dziṅwe na dziṅwe," ho amba Ramavhanga.
Vho engedza nga uri nyimele yo vha i tshi khou vha khombo i re khagala ya u dzhenelela ha thundu yavho. "Nga ṅwambo wa ḓivhazwakale ya u dzhielwa shango zwi siho mulayoni na khaedu dza mulayo dzine vhaṋe vha mavu vha sedzana nadzo kha u lingedza u bvisa vhadzulapo vha siho mulayoni, ndi yone fhedzi ine ya nga shuma ndi u vhofhololwa ha mulayo kha zwiito zwo lavhelelwaho zwi siho mulayoni nga vhafhinduli," vho ralo. "Ndi nṋe muṋe wa shango o teaho. Ndi nga si kone u dzula henefho ngeno Vho Davhana a tshi rengisa bulasi yanga a si na thendelo. Ndo mu sevha uri a songo isa phanḓa na zwiito izwi u swikela fhungo ḽi tshi tandululwa."
Mafhungo aya o swika kha khothe khulwane ngei Thohoyandou nga ḽa 10 Fulwi, he muhatuli Vho Violet Semenya vha dzhia tsheo kha sia la Vho Ramavhunga. Khothe yo thivhela vhaimeleli u ṋetshedza, u vhea mikano kana u ṱuṱuwedza u dzhiiwa ha tshipiḓa tshiṅwe na tshiṅwe tsha bulasi ine ya khou hanedzana. Vho vha vha tshi dovha vha thivhelwa u ita mushumo naho u ufhio wa u fhaṱa kha thundu nga tshiitisi tshiṅwe na tshiṅwe.
Musi vha tshi fhindula, Vhamusanda Vho Frank Davhana vho khwaṱhisedza uri ndi vhone muṋe wa bulasi o teaho, vha tshi ri shango ḽo ṋewa vhone nga muvhuso wa kale wa Venḓa. Vho hanedza uri vho lingedza u rengisa tshipiḓa tshiṅwe na tshiṅwe tsha shango. Fhedzi musi vha tshi vhudziswa nga vha nyanḓadzamafhungo ya Limpopo Mirror vhe vha vha vhe na vhuḓifhinduleli ha u rengisa mavu ane a khou humbulelwa, Vho Davhana vho kundelwa u ṋea phindulo.
Vhaṅwe vhalimi vha si gathi kha vhupo honoho na vhone vho bvisela khagala zwililo, vha tshi khou pomoka Vho Davhana uri vha khou rengisa zwipiḓa zwa shango ḽavho. Vhaṅwe miraḓo ya tshitshavha vho isa phanḓa na u amba uri Vho Davhana vho tshinyadza mavhiḓa a vho makhulukuku avho henefho fhethu.