Tshiṱori nga Ngerezah Netshifhefhe. Ṱhalutshedzo nga Khathutshelo Raliphaswa.
U bva kha muvhundu wo dzikaho wa Tshidimbini fhano Limpopo, Lady Tiana SA u khou ḓi sikela dzina kha nḓowetshumo ya muzika nga ipfi ḽawe ḽo khetheaho vhukuma kha muzika wa R&B ya musalauno kha ḽa Afrika Tshipembe. Lwendo lwawe lwo thoma kerekeni ya Salvation Army, hune muzika wa vha u tshi fhira maitele - ho vha hu nḓila ya vhutshilo.
O ḓivhadzwa nga mme na makhulu wawe vho lovhaho, o ḓivhadzwa nga ha u imba nga mbekanyamushumo dza kereke. O ri: "Ndo thoma u imba tshikoloni tsha Swondaha nahone kanzhi ndo vha ndi tshi ranga phanḓa. Ndi he nda zwi dzhiela nṱha uri ndi na dzangalelo ḽa vhukuma nga ha muzika."
Ho ḓa tshifhinga tshi ṱalusaho nga tshifhinga tsha vhuṱambo ha kereke. U ita zwithu zwi tshilaho zwo vusa tshiṅwe tshithu tsho dzikaho. "Ndo pfa ndi na u dzinginisea hu sa hanedzei. Ndi hanefho he nda ḓou ḓivha uri muzika ndi mbidzo khanne - hu si u sokou vha zwa uḓi mbvumbvusa fhedzi, fhedzi ndi nḓila ya u ḓiṱahisa."
Dzina ḽawe ḽa luvhanḓeni, Lady Tiana SA, ḽi hulisa ṱhuṱhuwedzo yawe ya muzika. "Khonani ye ya nḓivhadza mushumo wa studio yo vha i tshi amba uri ndo vha ndi tshi vhonala na u imba sa muimbi wa bvumo Rihanna. O vha a tshi divhidza nga u swaswa 'Tiana' ngauri dzina ḽanga ḽa vhuvhili ndi Thina - ḽo sokou nambatela," u ralo, a tshi khou sea. "Hune Rihanna avha hone zwa zwino ndi hune nda ṱoḓa u vha hone nga muzika. Dzina zwino ḽi imela mufumakadzi ane a shuma u fhodza na u takusa vhaṅwe nga kha muzika wawe."
Mubvumo wa Lady Tiana wo ḓitika nga R&B na Soul, na zwithu zwine zwa nga itea nga zwiṅwe zwifhinga zwa muzika wa pop, fhedzi ndi mvelele yawe ine ya mu fhambanya. "Ndi ṅwala nga Tshivenḓa na u dzhenisa miungo ya Venda u itela u ṋea muzika wanga vhudzivhani hanga. Nga nyimbo dzi ngaho Mufunwa Ndi Ene na Hope, ndo sika tshiṅwe tshithu tsho khetheaho tshapo, fhedzi tsha fhethu hoṱhe," u a ṱalutshedza.
Nyimbo yawe ya zwenezwino, SöulMåte, yo bviswaho nga ḽa 30 Shundunthule, i bva nga ho livhaho vhutshiloni hawe ha muthu nga eṱhe. O ri: "Ndo i ṅwalela muthu o khetheaho. Ndo vha ndi si na vhungoho nga hae mathomoni, fhedzi nga murahu ha u fhedza tshifhinga ndi ndoṱhe, ndo vha ndi tshi sokou pfa uri ndi ene ane a vha ene." "Vhunzhi ha nyimbo dzanga dzi bva kha tshenzhelo dza vhukuma."
Sa mufumakadzi muswa kha nḓowetshumo ya muzika wa Afrika Tshipembe, Lady Tiana o tea u tshimbila kha vhupo vhu konḓaho. O ri: "U hanedzwa nga vhaṅwe vhatsila na vhadzudzanyi vha vhuṱambo zwo vha zwi tshi konḓa mathomoni, fhedzi ndo guda u sa fhela mbilu na u difulufhela.
O dovha a amba nga ho livhaho nga ha vhuḓifari vhu songo teaho vhu bvaho kha vhaṅwe thangana dza murole dza vhanna. "Vhaṅwe vhathu kha nḓowetshumo vha ṱoḓa u ṱanganya bindu na dzangalelo ḽa muthu nga eṱhe - u ṋetshedza zwikhala kha maḓikiṱa kana zwishumiswa u itela u wana vhushaka ha tsini. Zwi a vhavha. Zwino ndi iledza zwiito zwo raloho nga tshifhinga tshine nda zwi pfa."
Hu sa londwi dzenedzi khaedu, o dzula o livhisa ṱhogomelo kha zwipikwa zwawe, a tshi ṱuṱuwedzwa nga lutendo na ndayo. "Ndi kha ḓi amba na vhathu nahone ndi ṱoḓa zwibuli, fhedzi a thi tsha tendela u hanedzwa hu tshi nṱalusa."
Zwa zwino u khou shuma kha EP ntswa, yo vhetshelwaho u bviswa mathomoni a ṅwedzi wa Ṱhangule. EP i katela tshumisano na vhaimbi vha fanaho na EasySA, Nèvie Bluè, JR Player na Daloo Dey. O dovha a shumisana na EasySA kha nyimbo yawe i ḓaho.
Ṱhuṱhuwedzo dzawe dza u sika dzi sumbedza u fhambana hawe. "Nga nḓila yapo, ndi sedza nṱha kha Mizo Phyll, Nevíé Blué, JR Player na Makhadzi. A vha ofhi - vha nga kona u ṱanganedza mubvumo naho u ufhio. Kha dzitshaka, ndi takalela vhaimbi vha ngaho Rihanna, Beyoncé, SZA, Jhené Aiko na Chris Brown. Ndi guda kha tshitaila tshavho na nḓila ine vha bveledza ngayo mizika yavho."
Kha Lady Tiana, muzika ndi tshipiḓa tsha lwendo lwawe. U fulufhela uri tshiṱori tshawe tshi ḓo ṋea vhaṅwe vhasidzana ṱhuṱhuwedzo vha bvaho kha zwitshavha zwa vhupo ha mahayani. "Ndi khou ṱoḓa vha tshi zwi ḓivha uri zwi a konadzea u lora zwihulwane, naho wa bva fhethu huṱuku hu fana na vhupo ha Tshidimbini, a u tei u shandula zwine wa vha zwone uri u swike shangoni."