Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Lidzhakanḓila kha muzika wa siala ya Tshivenḓa, Vho Elelwani Julia Nemakhavhani vha minwaha ya furathi-sumbe, vha kusi kwa Makwarani, nnḓa ha Thohoyandou, vho nangiwa kha pfufho dza muzika wa sialala wa Afrika Tshipembe (SATMA), kha tshiteṅwa tsha tshigwada/muimbi wa khwine wa Tshivenḓa. Vho nangiwa nga luimbo lwavho lwa "Dambila". Vhuṱambo ha u pfufhiwa zwiphuga vhu ḓo farelwa ḓoroboni ya Durban nga ḽa fumi-ṱhanu Nyendavhusiku ṅwaha-uno.
U nangiwa ha Vho Nemakhavhani a zwi ngo ḓa sa tshimangadzo sa izwi aḽibamu yavho ya u fhedzisela, 'Tshipure Maranga', yo takalelwa nga vhafuni na vhatakaleli vha muzika wa Tshivenḓa.
Vho Nemakhavhani vhovha vho takala vhukuma nga u nangiwa havho. Vhari nga u nangiwa uhu, vha pfa vho hulisea hone vha na fulufhelo ḽauri vha ḓo vhuya na tshiphuga hayani. "Ndovha ndo no lata fhulufhelo kha uri vhathu vha a takalela na u vhona muzika wanga. Ndovha ndi sa humbuli uri nga ḽinwe ḽa maḓuvha ndi nga nangwa kha makhaula tshele a tshiphuga itshi. Hone zwa zwino ndi pfa ndo maanḓafhadzea na uvha na fulufhelo ḽauri nga u khetha ha vhathu, ndi ḓo kona u vhuya na tshiphuga hayani. Haya a touvha maṱhakheni a buḓo ḽanga sa ramuzika sa izwi hu pfufho yanga ya u thoma, ndi tenda uri ndoro yanga i ḓo wedza," vha amba.
Vho Nemakhavhani ndi lidzhakanḓila kha muzika wa sialala, vha ḓivhelwa na uvha mutshini makone wa malende, vha dovha hafhu vha vha murangaphanḓa wa tshigwada tsha u tshina tsha sialala tsha 'Sialala a ḽi ngafi'.
Nga ṅwaha wa gidimbili fumbili vhe na bennde yavho ya 'Zwiakonadzea', vho kanḓisa aḽibamu yavho ya u thoma ya Tshivenda, Tangulani. Ndi he vha vhona uri vha nga kona u alusa muzika wa Tshivenḓa na u mvumvusa vhane vha u takalela. Aḽibamu iyo yo ḓou tevhelwa nga Tshipure Maranga, ye ya anḓadzwa mathomoni a ṅwaha uno.
Nga nnḓa ha muzika wavho, Vho Nekhavhani vha kovha nḓivho nga ha zwa sialala, vha dovha vha vha muraḓo wa tshivhidzo tsha United African Apostolic Church (ire fhasi ha Vho IJ Miriri).