Luambo na mvelele. Ṱhalutshedzo nga Khathutshelo Raliphaswa.
Milayo miswa ya Tshivenḓa na mbekanyamaitele na u peleṱa yo dzhia vhuimo ha vhukati nga tshifhinga tsha Mbekanyamushumo ya u Ṱanganedza Maṅwalwa o teaho a Vhurendi ha Tshivenḓa kha Laiburari ya Tshitshavha ya Thulamela nga Ḽavhuvhili ḽo fhiraho (26 Ṱhangule).
Tshivhudzo itshi tsho vha tshi u shumisana vhukati ha Tshumelo dza Vhueletshedzi ha Kwetso, Yunivesithi ya Venda, Muhasho wa Mitambo, Vhutsila na Mvelele, na Khoro ya Vhutsila na Mvelele ya Limpopo. Yo vha yo dzhenelwa nga vhaḓivhi vha luambo, vhaṅwali, dzikiḽaba dza bugu, vhashumi vha ḽaiburari, vhagudisi, vhagudi na vhaṅwe vha kwameaho kha tshikhala tsha maṅwalwa.
Yo thomiwa nga 2022, Mbekanyamushumo ya u Ṱanganedza Maṅwalwa a u Ḓivhadza nga ha Maṅwalwa i khou sedza kha u ṱuṱuwedza mvelele ya u vhala nga nyambo dza vhadzulapo vha Afrika Tshipembe.
Kate Lengwasa, mulanguli wa Tshumelo dza Vhueletshedzi ha Kwetso, ine ya langa mbekanyamushumo, o vhudza vhathetshelesi uri zwi ṱuṱuwedza tshitshavha uri vha kone u ṱanganedza u vhala nau ṅwala . "Ri khou sedza kha u fhisa lutamo na lufuno lwa u vhala, nga maanḓa maṅwalwa o ṅwalwaho nga nyambo dza vhadzulapo vha Afrika. Ri ṱoḓa u sumbedza u vhala sa zwi takadzaho, mvelele ine ya nga vha mushumo wa matshilo," vho ralo.
Vho Dokotela Nthambeleni Netshisaulu vho humbela tshitshavha uri tshi ḓiḓowedze kha zwa Orithogirafi ya Tshivenḓa na Milayo ya u peleṱa, yo bveledzwaho nga 2019 nga Bodo ya Luambo lwa Afrika Tshipembe ya Pan (PanSALB) na Tshigwada tsha Luambo lwa Lushaka lwa Tshivenḓa (TNLB). TNLB, ye ya vha i tshi ranga phanḓa nga muḓivhi wa luambo lwa Tshivenḓa a ḓivheaho Vho Prof Muloiwa, i katela vhagudi vha Tshivenḓa, vhaḓivhi na vhaeletshedzi vhe vha kuvhanganya milayo.
Vho Dokotela Netshisaulu vhari milayo yo dzheniswa kha u lulamisa vhukhakhi ha tshifhinga tshilapfu nga tshivhumbeo tsho nwalwaho tsha luambo. "Vhane vha humbula uri ri khou shandula luambo lwashu vho khakhea. Ri khou tou lulamisa zwe zwa ṅwalwa nga nḓila yo khakheaho miṅwahani minzhi yo fhiraho ... Ri tea u vhuedzedza vhuṋe hashu na vhungoho hashu nga luambo lwashu lwa u thoma."
Vhari vhanwali vhanzhi vha Tshivenda vho vha vha tshi vho shumisa milayo miswa kha bugu dzavho. "Naho ri tshi kha ḓi vha na nḓivho nnzhi ine ra fanela u i ita, heḽi ndi ḽiga ḽo teaho kha tshipikwa tshashu. Vhaṅwe vhathu vha ḓo hanedza tshanduko musi dzi tshi ḓa, naho zwo ralo, ri ḓo bvela phanḓa ri tshi vha ṱuṱuwedza uri vha ṱanganedze uri tshanduko ntswa dzi fhano u itela u dzula."