Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Ramiswaswo a ḓivheaho nau funwa nga vhathu, Mmboniseni Mudau (30), e avha a tshi vhidzwa nga ḽa 'Tshigo the comedian' kha nḓowetshumo ya vhumvumvusi, o lovha nga ḽa fumithihi Fulwana vhuongeloni ha Helen Joseph, a vhulungwa mavhiḓani a Folovhodwe Tshipale nga Mugivhela wa ḽa fumiṱhanu Fulwana. Tshigo o lovha nga murahu ha ulwa na vhulwadze ha tshifhinga tshiṱuku.
Tshigo o ḓi sikela dzina kha nḓowetshumo ya vhumvumvusi nga nḓila ye avha a tshi sika miswaswo yawe nga muongo wa luambo lwa ngei seli Kha la Zimbabwe. Vhunzhi ha vhathu vhori u anḓadza dzi vidio dzawe, havha u ḓivhea hawe sa ramiswaswo.
Khaladzi a Tshigo, Ronewa Mudau, uri lufu lwa Tshigo lwo sia vha muṱa vha tshi pfa vho xelelewa vhukuma hone. "Kha vhatevheli vhawe ovha e ramiswaswo fhedzi, fhedzi kha rine hayani, ovha e zwoṱhe zwine ra ṱoḓa. Khaladzi anga o lwa na vhulwadze hawe lwa minwedzi, fhedzi rovha ri na fulufhelo lauri u ḓo fhola. Tshigo ovha a tshi touvha ramiswaswo ene mune. Na kha miṱangano ya lushaka lwashu, ovha e na nḓila ya u ri mvumvusa nga miswaswo yawe. Ri ḓo dzulela u mu humbula," a amba.
Vhunzhi ha vhatevheli vhawe, mashaka na dzi khonana vho rumela milaedza ya ndiliso nga murahu ha u ri sia ha Tshigo. Munwe wa dzi ṱhama vhe vha rumela milaedza ya ndiliso u thoma hovha ṱhama yawe ya mbiluni, mumvumvusi na muhashi wa radio, na ramiswaswo ngae Rudzani Khalushi, ane a ḓivhea nga ḽa 'Bravo 1020' kha nḓowetshumo ya vhumvumvusi. "Ndo thoma u vhona Tshigo nga ṅwaha wa gidimbili fumi malo, nda ṱavhanya nda vhona vhukoni hawe, he vhunzhi ha vhathu vhovha vha sa khou vhu vhona, nda thomaha u mu zwima uri ndi mu wane. Ndori u mu wana nda thoma u anḓadza vhukoni hawe kha zwileludzi zwa vhudavhidzani ho fhambanaho. A thoma u ḓivhiwa na uvha na vhatevheli vhanzhi. U lovha ha Tshigo zwo nkwama vhukuma. Tshigo ovha asi ṱhama na mushumisani fhedzi kha nne. Rovha ro no fhaṱa vhushaka ho khwaṱhaho vhukati hashu. "
Munwe wa ṱhama dze dza rumela milaedza hovha ramiswaswo Livhuwani Madadzhe, ane a ḓivhea khwine nga ḽa SABC Livhu, e a ṱalusa lufu lwa Tshigo sa tshiwo kha nḓowetshumo ya vhumvumvusi.
Neḓorobo vha Musina, Vho-Godfrey Mawela, vho rumela mulaedza wa ndiliso kha vha muṱa, vhari "lufu lwa Tshigo asi u xelelwa ha muṱa wa ha Mudau na nḓowetshumo ya vhumvumvusi fhedzi, lu dovha hafhu lwavha u xetshelwa ha vhupo ha Musina."
Mulindelo wo farelwa Folovhodwe Tshipale hu tshi itelwa tshihumbudzo tsha Tshigo nga Lavhuṱanu, Fumiina Fulwana.