Ṱhalutshedzo nga Khathutshelo Raliphaswa.
Ramuzika a ḓivheaho, muṅwali wa muzika na mufunzi Lufuno Dagada u kha maano au awela kha zwa nḓowetshumo ya zwa muzika. U ḓo anḓadza aḽibamu yawe yau fhedzisela nga ṅwedzi wa August ine ya ḓovha aḽibamu yau kanḓiswa musi gogo lavhathu vha tshi zwi vhona.
Ramuzika uyu o vhudza vha nyanḓadza mafhungo ya Limpopo Mirror zwauri u pfa uri o no bveledza nau swikelela zwinzhi kha nḓowetshumo ya zwa muzika, fhedzi zwa zwino u khou ṱoḓa u awela. Kha Lufuno wa minwaha ya fuṱhanu, izwi azwi ambi u dzhia vhuawelo lwa tshoṱhe kha nḓowetshumo ya zwa muzika sa izwi a tshi ḓovha a khou pfumbudza vhoramuzika vhaswa. Naho zworalo, aḽibamu iyi ndi ine a ṱoḓa uri ivhe yawe yau fhedzisela.
"Athina maano au vhuya kha zwa muzika. Ndi tenda zwauri ndo shela mulenzhe zwihulu kha nḓowetshumo ya zwa muzika," a amba. O amba zwauri lwendo lwawe sa ramuzika oḓi imisaho nga eṱhe lwo thoma nga ṅwaha wa 2001. "Ndi muṅwe wa vhatumbuli vha tshigwada tsha Worship House," a engedza. O tumbula Worship House nga ṅwaha wa 2004 na mulangi wa kale wa Radio Thohoyandou,ine zwa zwino yotanganywa na radio Venda ine zwino ivhidzwa Phalaphala FM, Pastor Isaac Dagada.
Musi a Worship House, o bveledza nyimo dza bvumo u fana na Mifhululu, Wedding Song na Kha Vha Rendwe. A ḓovha ramuzika oḓi imisaho nga eṱhe nga ṅwaha wa 2001, nga ṅwaha uyo o ḓou ṱhaphudza pfunzo dzawe Yunivesithi ya Venda na digirii ya batshela.
Lufuno ono ita ṱhanganyelano na mubveledzi Wanga Mukwevho, he vha anḓadza aḽibamu dza tshivhalo u fana na My Practical God, na nyimbo dzi fanaho na Zwoluga, Lekunutung na Vatamavona na Mbilu Yanga Yo Takala.
Kha zwiphuga zwine o no win ahu katelwa zwiphuga zwa Tshivenda Music Awards (TSHIMA) na dzone dza Crown Gospel Music Awards.
"Kha zwe nda guda, ndo gudesa uri ndi fanela u vhea fulufhelo ḽanga kha ene Mudzimu u fhira vhathu. Ndo tenda khauri ndi na vhutsila hone ndi aḓi rwela zwanḓa musi ndo ita zwithu zwavhuḓi vhutshiloni," a amba.
Lufono o bebwa a aluswa Tshamulungwi Harambuda. O amba zwauri opfa tshifhinga tsho swika minwaha i paḓaho ya furaru yo fhiraho. Oḓi imisela u kovha nḓivho yawe na vhaṅwe. "Kha vhoramuzika vhane vha khou aluwa nau thoma mabuḓo avho kha ino nḓowetshumo, ngeletshedzo yanga yo leluwa: gudani u ṅwala nyimbo ntswa na uḓi nea tshifhinga tsha u ṱuṱula vhutsila na mpho yanu, U edze zwine vhaṅwe vhavha zwone zwi kanula zwikhala zwanu zwau aluwa," a amba.
Vho Musiwalo Sikhauli, ṱhama ya Lufuno, vho amba zwauri mutshini makone ua ḓivha tshifhinga tsha u bva luvhanḓeni. "Lufuno ndi muṅwe wa vhoramuzika makone u mona na Limpopo, hoṱhe nḓuni dzau kanḓisa mizika na luvhanḓeni. U khou sia ifa ḽauri muthu avhe na vhuḓifulufheli kha ipfi ḽawe hone muthu a songo lwela uvha zwine asivhe zwone," Vho Sikhauli vha amba.
Lufuno Dagada uḓo mbvumbvusa vhathu lwau fhedzisela musi a tshi kanḓisa aḽibamu yawe vhathu vha tshi zwi vhona ngei Pretori nga ḽa furaru-thihi Ṱhangule ṅwaha uno.