Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Mulalo Luvhimbi ane avha muswa wa ramabindu ubva Mianzwi nnḓa ha Ṱhohoyanḓou, u eletshedza vhanwe vhaswa uri vha shumise mavu u ḓi shumela vhone vhane.
Luvhimbi o bebwa muṱani wa vhorabulasi, u dovha hafhu a livhuwa uri o kona u bveledzisa uvha rabulasi hawe sa izwi hahawe vha na bulasi kha kusi uko. O aluwa a tshi dzulela u fhelekedza mme awe masimuni, ndi he a kona u ḓivha nga ha vhulimi. Luvhimbi ndi mutshudeni, fhedzi u dovha hafhu a tshimbidza bindu ḽawe ḽiṱuku ḽa uvha rabulasi. Nga zwifhinga zwine avha a sina mishumo minzhi ya tshikolo, u wanala tsini ha bada a tshi rengisa maḓabula na nḓuhu kana a tshi ṱahulela zwimedzwa zwawe masimuni.
Luvhimbi wa minwaha ya fumbili ṱhanu ndi mutshudeni ane a khou gudela N6 ya uvha makhanikhe kha gudedzi ḽa Vhembe TVET kha khamphasi ya Makwarela. Fhedzi naho a khou gudela uvha makhanikhe, ha laṱi budo lawe la uvha rabulasi hawe.
"Muthu anga kona u funzea avha na ndalukanyo nnzhi, fhedzi a kundelwa u wana mushumo. Naho ndi tshi ḓovha makhanikhe ozwi gudelaho, athina vhuṱanzi uri ndi tshi fhedza u ṱhaphudza pfunzo dzanga ndi ḓo wana mushumo. Fhedzi arali muthu ane mavu, u dzula ana mushumo. Ndi ḓi pfa ndi na mashudu sa izwi ndo bebwa muṱani hure na mavu ane nda nga lima khao. Bulasi yanga yo novha tshipiḓa tsha vhutshilo hanga lune nda fhira ḓuvha ndi songoya khayo, ndi pfa unga huna zwine zwa khou ṱahela vhutshiloni hanga. Ndi tenda uri nga u shuma ndo ḓi imisela, ndi nga kona u ḓi ṱhogomela zwavhuḓi na u ḓi rengela goloi na nnḓu, ndi sa hangwi nau ṱhogomela vhathu hayani," a ṱalutsheza.
Naho a tshi ṱangana na dzi khaedu zwi tshi ḓa kha vhulimi, Luvhimbi oḓi imisela u kunda khaedu idzo dzoṱhe sa izwi a tshi ṱoḓa uvha rabulasi o bvelelaho zwavhuḓi. Zwa zwino u khou ḓi lugisela u kana dzi nawa tshifhinga tshi tshi ya.
Luvhimbi u humbela uri muvhuso u ṋee vhaswa thikhedzo kha mabindu avho ane vhaa thoma na ane vha khou a takula uri avhe a khwine. "Vhunzhi ha vhorabulasi vhaswa vha na ṱhahelelo ya masheleni au tshimbidza mabindu avho a vhulimi zwavhuḓi. Vha fanela uvha thusa nga zwishumiswa zwi fanaho na maṱiraka, dzi mbeu, mishonga na zwinwe zwinzhi sa izwi vha tshi kundelwa uzwi swikelela. Nne athina zwienda kana zwone zwiambaro zwo fanelaho zwinishumiswa musi muthu akhazwa vhulimi, fhedzi ngauri ndi na lutamo lwa vhulimi, ndi ḓi ambara zwiambaro zwanga nda dzhena tsimuni nga milenzhe nda shuma vhulimi hanga," a amba.
Luvhimbi u eletshedza vhaswa uri vha ḓi sikele mishumo, nga mbuyelo dza zwine vha nga rengisa, vhaa kona u bveledza miḽoro yavho.