Tshiṱori nga Thembi Siaga. Ṱhalutshedzo nga Khathutshelo Raliphaswa.
Musi nyanḓadzamafhungo ya matshilisano i tshi khou ḓivhadza nyambedzano ya tshitshavha nga nḓila i engedzeaho, murafho muswa wa "mutsila" u khou dzhena kha nḓowetshumo – sa muṱuṱuwedzi. Muṅwe wa vhathu vho raloho a tshi khou kokodza ṱhogomelo ya zwigidi kha inthanethe ndi Mashudu Lucky Ndou, ane a ḓivhiwa khwine sa Galinkuta kha zwileludzi zwa vhudavhidzani ha nnyi na nnyi.
Ndou, ane a bva Tshitavha Sambandou, o tou thoma u wana lufuno lwa u ḓimvumvusa tshikoloni tsha musi ekha murole wa nṱha. Fhedzi ho vha hu nga 2019, nga murahu ha u renga iPhone yawe ya u thoma, he a ḓikumedzela tshoṱhe kha u sika zwi re ngomu. U thomani u kovhelana vidio kha WhatsApp, zwi re ngomu hawe zwo ṱavhanya zwa phaḓalala musi vhaṱaleli vha tshi khou tshimbidza zwipiḓa zwawe nga ngomu ha zwigwada zwavho - zwi tshi swaya u thoma ha u bvelela hawe kha vhuimo ha nṱha ha zwileludzi zwa vhudavhidzani ha nnyi na nnyi.
U ḓivhea hawe ho gonya nga murahu ha musi o no thoma siaṱari ḽawe ḽa TikTok, he vidio dzawe dzi takadzaho na dzi re na vhushaka dza mu ṋea vhatevheli vhanzhi. Musi u swikelela hawe hu tshi khou aluwa, vhasiki vho khwaṱhaho vho thoma u posa vidio dzawe, vha vha thusa u phaḓalala nga ho engedzeaho.
Nga nnḓa ha u bvelela hawe kha nyanḓadzamafhungo ya matshilisano, Galinkuta o ḓidzhenisa kha muzika. Zwe zwa thoma sa nyengedzedzo ya u tamba ya zwi re ngomu hawe nga u ṱavhanya zwo mbo ḓi vha u ṱoḓa ho dzikaho. Muzika wawe, u fana na vidio dzawe, u pfala na vhathetshelesi vhawe - u shandukisa zwithu zwine zwa nga takadza zwa vha nḓila ine ya nga vha hone ya mushumo.
Naho o vha a tshi ṱavhanya u vha na bvumo, Mashudu o dzula a tshi ḓiṱukufhadza na u vha na mutheo, a tshi khoḓa u bvelela hawe kha u dzhenelela ha Mudzimu. Naho zwo ralo, o tenda uri u ṱhogomelwa nga u ṱavhanya zwi nga vha zwihulwane, zwihuluhulu musi zwi tshi ṱangana na pulane dzawe dza u vhuyelela kha pfunzo dzawe.
"Tshiṅwe tshifhinga ndi pfa u nga diabolo u khou amba na nṋe ngauri ṱhogomelo iyi yo ḓa nga tshifhinga tshe nda vha ndo ḓiimisela u vhuyelela tshikoloni," u ralo. "Fhedzi mafheloni a ḓuvha, hezwi zwo ntendela u vhea zwiḽiwa ṱafulani na u ṱhogomela muṱa wanga. Ndi phaṱhutshedzo."
Mashudu u tutuwedza vhanwe vhaswa uri vha vhee phanda pfunzo. O ri: "Ndi tenda uri muswa muṅwe na muṅwe u fanela u ita ngudo dza u thoma." "Musi no no vha na yeneyo ṱhanziela, ni nga kona u ṱolisisa vhukoni haṋu na pfaneleo dzaṋu."