Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Hobva maḓana a miraḓo ya zwivhidzo zwo fhambanaho vha tshi matsha kha zwiṱaraṱa zwa Shayandma vha tshi kuvhanganela swondaha yau rangela paseka.
Miraḓo ye ya imelela dzi kereke dzi ngaho; African Methodist, Episcopal Church, Evangelical Lutheran Church, Angelic Church, Full Gospel Church, Uniting Presbyterian Church na vha Uniting Reformed Church vho matsha vha tshi tshimbila u bva vhuongeloni ha Tshilidzini u swika kha kereke ya Lutheran Shayandima vho rangiwa phanḓa nga bennde ya brass hone muraḓo munwe na munwe o fara lutavhi lwawe lwa muri.
Meyara wa Vhembe Vho-Dowelani Nenguda, Meyara wa Thulamela Vho-Sarah Rambuda, vhafunzi vhahulwane na vhabishopho vhau bva kha dzi kereke dzire hone vho losha vhuṱambo uhu ha ṅwaha na ṅwaha nga vhuhone havho. Khau lumelisa havho, Vho-Nenguda vho livhuwa dzi kereke khau farana he dzi kereke dza sumbedzisa.
"Ri ṱangana na dzi thaidzo nnzhi sa shango, mushumo uyu ndi wau rabelisa shango kha thaidzo idzo," hu amba mudzula tshidulo wa All Saints Fellowship Forum Shayandima, vho-Jabulane Monegi. "U seilisana ha muḓagasi ndi inwe ya dzi khaedu dzine dzo novha nḓila yau tshila kha shango ḽashu, ri rabela sa kereke uri hu wanale dzi thandululo kha khaedu dza zwino sa izwi dzi tshi kwama ikonomi ya shango nga nḓila isi yavhuḓi. Ri dovha hafhu ra rabelisa na muphuresidennde Vho-Cyril Matamela Ramaphosa uri vha wane maanḓa au ranga vhathu phanḓa. Vha Zondo Commission vho ita wavho mushumo hone ri rabela uri vha NPA vha fare vhane vho dzhia masheleni a muvhuso nga nḓila ya vhufhura", vha engedza.
Khombo dza badani nga zwifhinga zwa u awela ha paseka na mabulayo a mbeu kha vhupo ha Ṱhohoyanḓou zwine zwo no kalula ndi zwinwe zwa zwithu zwine zwa vhilaedzisa kereke. "Ri huwelela vhathu vhane vha ṱangana na dzi thaidzo miṱani uri vha wane thuso vhasi vhulaane," vha amba Vho-Monegi.