Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Ramiswaswo Emmanuel Phunyugu wa minwaha ya furaru-raru u khou khoḓiwa nga vhanzhi zwi tshi tevhela vhutsila hawe ha u bveledza miswaswo. Uyu ramiswaswo u ḓivhea khwine nga ḽa Smanuza. Smanuza, u vhonwa sa munwe wa vhoramiswaswo vha khwine kha ḽa Afrika Tshipembe.
Naho a tshi dzula kusini kwa Maebane Hakutama, u a swika na kha zwisi zwa kule nga vhutsila hawe. Zwa uvha ramiswaswo ndi vhutsila he a tou ḓi gudisa minwaha i fhiraho ya sumbe yo fhiraho. Azwi ngo thoma afho, musi a tshe mugudiswa kha pfunzo dza fhasi na dza nṱha, ovha a tshi anzela u mvumvusa vhagudiswa ngae na vhagudisi. Nga u vhona vhutsila hawe, vhathu vha thoma u mu ramba kha vhuṱambo havho uri aḓe u vha mvumvusa, havha u takutshedza ha buḓo lawe.
O no shuma na vhanwe vho ramiswaswo hu tshi katelwa munnaavhane Tshigo na Cyria The Community, hone ha teledzi u amba uri nḓila ya u bvelela zwavhuḓi ina khaedu dza u fhambana. Ene u ḓi vhona sa ramiswaswo are na vhumatshelo havhuḓi kha nḓowetshumo ya vhumvumvusi.
O phuletshedza nga ṅwaha wa gidimbili fumi-na-ṱhanu musi nyanḓadzo yawe ya vidio i tshi ita bvumo kha vhudavhidzani ho fhambanaho. Vidio iyo, ye yavha ina ṱhoho ya "Mukapi wa tshisima a si munwi watsho", he avha a khou gudisa munna wa mukhuwa nḓila ya u amba Tshivenda. Nga u takalelwa na uvha na u vhoniwa nga vhathu vhanzhi, zwa mu ita ene ramiswaswo wa bvumo nga itsho tshifhinga.
U elelwa minwaha ya fumi yo fhiraho musi vhatevheli vhawe vha tshi mu vhudza uri vhutsila hawe vhu ḓisa dakalo matshiloni avho. "Minwaha i tshi sendela, ndo mbo ḓi limuwa uri vhathu vho fanelwa nga dakalo vhutshiloni. Ndo no wana ndayo u bva kha vhaṱali vhane vha tenda uri muthu ha faneli u dzula o kwata sa izwi zwi tshi tshinya mutakalo wa muthu," a amba.
A tshi sedza lwendo lwawe kha buḓo iḽi, u elelwa musi a tshe muswa kusini kwa hawe, he vhanwe vhathu vha vha vha tshi ita miḓai ngae husina tshivhangi tshi pfalaho nga zwiito izwo. Nga u vhona zwiito izwo zwa vhathu, o ḓou zwi shumisa sa nḓila ya u ḓi maanḓafhadza. "Ndi hone he ha simuwa mpho ya vhumvumvusi kha nne," a engedza.