Tshiṱori nga Silas Nduvheni. Ṱhalutshedzo nga Khathutshelo Raliphaswa.
Phakhethe ya masheleni i swikaho kha R100,000, yo fhandekana vhukati ha zwikolodo na magavhelo, yo ḓivhadzwa kha dzulo ḽa Tshikwama tsha Thikhedzo ya Mavhengele a zwimauswu tsho farwaho nga Ḽavhuṱanu, ḽa 6 Fulwi, Holoni ya Tshitshavha ya George Phadagi ngei Thohoyandou. U ṋetshedzwa ha masheleni zwi khou sedza kha u thusa mavhengele a zwimauswu kha Tshiṱiriki tsha Vhembe nga u renga zwitoko, u khwinisa themamveledziso, u fhisa, u ṱanganya, na vhugudisi.
Vho Siziwe Zulu, Mulanguli wa Spaza Shop Funding ya u ṋetshedza masheleni kha zwiphaza(mavhengele akholekhole) u bva kha Muhasho wa Mveledziso ya Mabindu Maṱuku, vho amba uri vhukando vhu tikedza mavhengele a u rengisa zwithu nga ḓoroboni nga kha u vusuludza na u ṱanganya zwithu zwinzhi. "Tshelede iyi i ṋetshedza thikhedzo ya masheleni na i si ya masheleni, hu tshi katelwa vhukoni ha thekhinikhala, u tevhedza milayo, na u fhaṱa vhukoni ha vhaṋe vha mavhengele a mavhengele akholekhole shango ḽoṱhe," Vho Zulu vha amba.
Vho ṱalutshedza uri mbekanyamushumo yo sedza kha mavhengele a kholekhole ane a vha a Afrika Tshipembe ane a khou shuma vhuponi ha mahayani na vhuponi ha dzi ḓoroboni. Mabindu o teaho a tea u vha a 100% ubva Afrika Tshipembe, o ṅwaliswaho kha mimasipala na vha SARS, a tevhedze milayo, na u shumela zwitshavha zwapo.
U vha ha ndeme zwi ḓo ṋewa vhabindudzi vha vhaswa vha re na miṅwaha ya 18-35, mavhengele a zwiphaza a vhafumakadzi, na vhathu vha re na vhuholefhali.
Vho Albert Madadzhe, mune wa Chinaki Spaza kha muvhundu wa mahayani wa Makwarani tsini na Thohoyandou, vho tanganedza masheleni ayo. "Vhaṅwe vhashu ri shuma vhuponi ha mahayani ho dzikaho hune thikhedzo ya masheleni ndi ya ndeme kha u alusa mabindu ashu," vho ralo. Vho Madadzhe vho engedza nga uri thendela iyi yo vha thusa u pfesesa maitele a masheleni na hune a nga ita khumbelo hone.