Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Musi vhaswa vhanzhi vha miṅwaha yawe vha tshi kha ḓi humbula vhumatshelo havho, Maduvha Luvhengo wa miṅwaha ya 19 u khou ḓiitela dzina kha nḓowetshumo ine ya vhuswa nga vhanna ya uvha malogwane kha mutambo wa bola ya milenzhe.
Maduvha o bebiwa kha vhupo ha Tshivhungululu, zwo ralo Maduvha o thoma u funa bola a tshi kha ḓi vha muṱuku vhukuma.
O ṱalutshedza a ri: "Ndo thoma u lora nga ha bola ya milenzhe musi ndi na miṅwaha ya 13 fhedzi.
Fhedzi u fhambana na vhunzhi ha vhaswa vhane vha vha na muḽoro wa u vha mutambi vha ṋaledzi, Maduvha o vhea zwipikwa zwawe kha tshipikwa tsho fhambanaho - u langa mitambo kha vhuimo ha nṱhesa.
U tenda uri Limpopo o bveledza vhukoni vhunzhi ha bola ya milenzhe, ho katelwa na mutsireledzi wa Bafana Bafana na Mamelodi Sundowns Khuliso Mudau, fhedzi u kha di shaya muṱuṱuwedzi wa ntha wa mufumakadzi. Hetshi ndi tshikhala tshine a fulufhela u tshi ḓadza.
U ḓikumedzela hawe kha mushumo wa zwanḓa zwi khou bvelela zwavhuḓi. Nga tshifhinga tsha makhaulatshele a SAFA Vhembe Champs of Champs dze dza tambiwa luvhanḓeni lwa Thohoyandou nga ḽa 5 Fulwana, Maduvha o nangiwa sa Murengululi wa Thonamennde. O ṱuwa na tshelede ya pfufho ya R1,500 na tshiphuga nga murahu ha musi o no fhedza u fhedzisela vhukati ha Rabali Pull Together na Vhembe Tron, ye ya fhedza nga 1-0 i tshi tikedza Pull Together.
Maduvha uri muloro wawe ndi wa uvha malogwane kha Tshiphuga tsha Ḽifhasi tsha FIFA ḽiṅwe ḓuvha, nahone u shumisa tshikhala tshiṅwe na tshiṅwe kha ligi dzapo sa tombo ḽa u dzhia vhukando kha tshipikwa itsho.
"Vhathu vha fanela u nṱuṱuwedza kha kushumele kwanga hu si ngau sedza mbeu yanga," a ralo.
U humbula mutambo wawe wa u thoma wa ligi ya SAFA vhembe, vhukati ha Mukumba Shooting Stars na Mbilwi United.
"Mashudu mavhuya, mutambo wo tshimbila zwavhuḓi vhukuma nahone wa fhedza nga 2-0 u tshi tikedza United. Nga murahu ha mutambo, vhathu vhanzhi vho vhudzisa uri ndi ngani ndo vha ndi henefho sa malogwane. Vhaṅwe vho nnyimela vha ri, 'Sedzani mishumo yawe. U a ḓivha zwine a khou ita.'"
Hu sa londwi khaedu dzine kanzhi dza ḓa nga u vha malogwane wa mufumakadzi, Maduvha u ri ha ngo vhuya a rwiwa kana u sa ṱhonifhiwa mudavhini nga zwifhinga zwa mitambo.
"Ndi ita vhungoho ha uri ndi tevhela milayo yoṱhe, nahone hezwi zwia ita uri vhanwe vha nṱhonifhe. Mbuno ya uri ndi mufumakadzi a i na vhushaka na maanḓa anga kha mudavhi," o ralo.
"Ndi a ḓihudza nga nḓila ine vhatambi vha vhanna na vhaofisiri vha nṱanganedza ngayo musi ndi tshi khou langa mitambo."