Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Nga murahu ha miṅwaha i fhiraho 40 ya u lindela u awela havho huhulwane, Vho Mmbangiseni Ernest Madzivhandila - vha ḓivhiwa khwine sa Muṋe kha ḽifhasi ḽa u ḓimvumvusa - vho fhedza vho wedza muloro wavho. Mutambi wa muzika wa sialala wa Tshivenda wa minwaha ya futhanu vha bvaho Tshakhuma Dzananwa vho rekhoda aḽibamu yavho ya u thoma ye ya vha yo lindelwa lwa tshifhinga tshilapfu, ine ya vhidzwa uri Mukatshelwa.
Aḽibamu ya nyimbo dza malo, yo rekhodiwaho na mubveledzi Ace Nelton Dama kha vhubveledzi ha musika wa Dama ngei Tshifulanani, i na nyimbo dzi ngaho Mukatshelwa (dzikhombo ya tshiṱoho), Mulingoni Vho Muvalela, na Vhana vha tamba nga Jeso Ngani. Yo bviswa lwa tshiofisi nga Nyendavhusiku 2024.
Kha Madzivhandila, tshifhinga hetshi tshi swaya tshipikwa tsha lwendo lwe lwa thoma musi vha tshi kha ḓi vha na miṅwaha ya 17. "Khotsi anga, Vho Elias Madzivhandila, vho vha vhe mutambi wa mbila a ḓivheaho, nahone ndo vha ndi tshi dzula nda vha thetshelesa vha tshi tamba. Ndi henefho he lufuno lwanga lwa muzika lwa thoma hone. Fhedzi nṱhani ha u tevhela milenzhe yavho, ndo nanga kaṱara, nahone ndo vha ndi tshi khou tamba u bva tsheetsho," vho ralo.
Nḓila yavho ya u bvelela kha u rekhoda yo vha i kule na u leluwa. Nga 1981, Radio Venda yo rekhoda muṅwe wa muzika wavho, fhedzi pfaneleo yo vha i si yavhuḓi, nahone nyimbo dzo vha dzi sa anzeli u lidziwa muyani.
"Zwenezwo a zwo ngo nkula nungo. Ndo vha ndi tshi dzulela u ḓivhudza uri ndi ḓo rekhoda albamu yo teaho ḽiṅwe ḓuvha. Nga murahu ha miṅwaha ya mahumi maṋa, ndi fhano. Zwo vha zwi tshi nga dzhia tshifhinga tshilapfu, fhedzi u lindela zwo vha zwo tea. Zwino, vhathu vhe vha hanelwa muzika wanga lwa tshifhinga tshilapfu vha nga fheleledza vho ḓiphina ngawo," vho ralo.
Vho Madzivhandila vho sumbedza u livhuwa nga ho khetheaho Vho Nelton Dama kha u ita uri muloro wavho u bvelele. "Ndi livhuwa nga nḓila i sa tendisei thikhedzo yavho. Arali hovha hu si vhone heyi aḽibamu yo vha i sa ḓo konadzea," vha ralo.
Musi vha tshi sedza phanḓa, avhana pulane dza u fhungudza luvhilo. "Ndi khou shuma kha dziṅwe aḽibamu tharu ṅwaha uno. Ndo no fhedza u rekhoda aḽibamu ya gospel. Samusi ndi na maanḓa, ndi ṱoḓa u lifha tshifhinga tsho xelaho. Ndo no vhulunga muzika munzhi miṅwahani yo fhiraho, nahone zwino ngauri ndi na tshikhala itshi, ndi khou bva zwoṱhe," vha engeengedza.
Mukatshelwa zwa zwino i khou rengiswa nga u phaḓaladza thwii fhedzi u ḓo wanala kha pulatifomo dza muzika wa didzhithala vhukati ha 2025.