Tshiṱori nga Ngerezah Netshifhefhe. Ṱhalutshedzo nga Khathutshelo Raliphaswa.
Ramuzika wa bvuma, wa maanḓa wa Limpopo Makhadzi o nangiwa sa Muimbi wa Ṅwaha kha Pfufho dza Muzika dza Metro FM dza 2025, dzo farwaho nga Mugivhela vhusiku luvhanḓeni lwa Mbombela - gundo ḽe ḽa vusa vhuṱambo ho phaḓalalaho u mona na shango na u fhira.
Nḓivhadzo iyi yo bveledza dakalo kha nyanḓadzamafhungo ya matshilisano, vhafuni na vhatevheli vha muzika wawe vhatshi khoḓa muimbi wa Ghanama sa khosikadzi ya muzika ya Afrika Tshipembe ine ya khou vhusa. Hashtag dzi ngaho #Makhadzi na #ArtistOfTheYear dzo vha dzo ḓala kha mutevhe wa zwithu zwine zwa khou itea, na zwigidi zwa vhatikedzi vha tshi khou kovhelana zwipiḓa zwa vidio, u hulisa na milaedza ya u fhululedza.
Heyi ṱhonifho ya zwenezwino i ṋea khare zwe zwa vha zwi ṅwaha wa ndeme kha Makhadzi, we mathomoni a wana Mutambi wa Nṱhesa wa Ṅwaha kha Pfufho dza Trace dza 2025 ngei Zanzibar nahone a huliswa kha Pfufho dza BET dza 2024 nga Khetho ya Vhaṱaleli: Mulayo Muswa wa Nṱhesa wa Dzitshaka. Hezwi zwipikwa zwi sumbedza ṱhuṱhuwedzo yawe ine ya khou aluwa kha ḽifhasi musi a tshi khou bvela phanḓa na u sumbedza midzi yawe ya mvelele nga kha muzika na u tshina.
Pfufho dza Muzika wa Metro FM, iṅwe ya vhuṱambo ha muzika wa zwa vhubindudzi vhu rangaho phanḓa ha Afrika Tshipembe, yo vhuya ṅwaha uno na mbekanyamushumo yo ḓalaho ṋaledzi ine ya dzhiela nṱha vhukoni kha tshaka dzoṱhe. Gundo ḽa Makhadzi kha khethekanyo ya Mutsila wa Ṅwaha wo khwaṱhisedzwaho nga vhafuni zwi vhonala nga vhunzhi sa tshifhinga tsha u bvelela kha vhukoni ha vhupo ha mahayani na ho dzhielwaho fhasi kha nḓowetshumo ya muzika.
U ḓivhelwa u tshina hawe ha fulufulu ḽa nṱha na mubvumo wa u bvisa lushaka, Makhadzi - o bebwaho Ndivhudzannyi Ralivhona ngei Hamashamba - o no vha tshiga tsha u konḓelela na ṱhuṱhuwedzo, zwihuluhulu kha vhaswa vha Limpopo. Lwendo lwawe u bva kha u rengisa dzi-CD kha zwikhala zwa thekhisi u swika kha u ṱanganedza u khoḓiwa ha lushaka na ha dzitshaka zwo pfala vhukuma na vhafuni, vhane vha vhona zwipikwa zwavho zwi tshi vhonala kha u gonya havho.
Kha tshiṱiriki tsha hayani tsha Vhembe, zwitshavha zwo vha zwi tshi khou sumbedza u kunda nga u pembelela mitandani na mahayani a miṱa, zwi tshi khou bvisela khagala u ḓikukumusa hune dzingu ḽa vha hone kha iṅwe ya ṋaledzi dzaḽo dzi penyaho vhukuma. Maipfi a ḓivheaho o dovha a engedza thendo dzavho. Muhashi wa Phalaphala FM Vho Sharon Ravele vho zwi vhea kha X: "Ri a dihudza nga vheiwe Makhadzi! Limpopo u kha mapa!" Muhulwane Vho Livhuwani Matsila vha Matsila Foundation vho ri: "Nganea yawe ndi ya u tutuwedza. Vha isa phanda na u fhufhisa fulaga ya vundu lashu nga u dihudza."
Makhadzi u khou lavhelelwa u thoma lwendo lwa Southern Africa, na matambwa o khwathisedzwaho ngei Botswana, Zimbabwe na Namibia. Tshigwada tshawe tsha vhulanguli tsho dovha tsha sumbedza u shumisana ha dzitshaka hu ḓaho na ḽiṅwalo ḽo dzudzanywaho u bviswa nga murahu ha ṅwaha uno.