Tshiṱori nga:Kaizer Nengovhela. Ṱhalutshedzo nga: Khathutshelo Raliphaswa.
Vha tshiṱitshi tsha Phalaphala FM vho ḓivhadza vhaimbi vhane vha ḓo mvumvusa vhafuni vhamuzika kha bepha la Phalaphala FM Royal Heritage festival la vhuṱahe. Vhuṱambo uvhu vhu ḓo farelwa Nandoni nga ḽa fumi rathi Khubvumedzi ṅwaha uno. Nḓivhadzo iyo yo ḓivhadzwa nḓuni dza khasho dza SABC ngei Auckland park, Gauteng, nga ḽa u thoma ḽa Ṱhangule.
Muambeli wa vhuavhadzudzanu vha vhutambo uvhu, Vho-Divhambele Mbalavhali, vhari vhunzhi ha vhadzulapo vha zwisi zwa tsini na Nandoni vha ḓo vhuyelwa nga vhuṱambo uvhu. "Ri lavhelela uri vhathu vhanzhi vha swike, hone zwi ḓo vhuedza na vhoramabindu vhapo," vha amba.
Vho-Mbalavhali vhari ndivho ya u fara vhuṱambo ndi u alusa nau ḓivhadza vhaimbi kha ḽifhasi ḽa muzika, nga u anḓadza vhukoni na vhutsila havho. Vhaimbi vha ḓo dovha hafhu vha kona u kovha nau ṱanḓavhudza vhukoni havho nga kha bepha ili.
Mulangi wa mabindu wa SABC ya Limpopo, Vho-Madikana Matjila, vhari vhafuni na vhatevheli vha muzika vha ḓo mvumvuswa vhukuma nga vhaimbi vhane vha ḓo kanḓisa mizika yavho. Vhanwe vha vhaimbi vhane vha nga vha lavhelela luvhanḓeni ndi Zozo, Colbert Mukwevho, Cyria the Community, Leonard Karikoka, na Gusba Banana, u tou bula vhaṱuku kha vhanzhi.
Muimbi ane a funeswa hone a ḓivheaho a bvaho Vhembe, Makhadzi, u ḓo kanḓisa muzika wawe luvhanḓeni nga ḓuvha iḽo. Hone uri una fulufhelo ḽa uri u ḓo ṋea vhatevheli zwine vha takalela. "A thi ramuzika ane a imbela u takadza vhathu fhedzi, ndi dovha nda imbela u funza vhathu nga ha vhutshilo," a amba.
Thikhithi dzi khou rengiswa Spar, BP, Sasol, Fresh Store, na mavhengele a Power, nga mutengo wa R230 muthu muthihi.