Tshiṱori nga: Maanda Bele. Ṱhalutshedzo nga: Khathutshelo Raliphaswa.
Mufumakadzi wa minwaha ya fuina-ina o ḓi vhonadza khothe ya madzhisiṱiraṱa wa Ṱhohoyandou nga Musumbuluwo wa ḽa fumi malo Khubvumedzi vholivhana na mulandu wa u zwifhela mulayo na u tswa muḓulu wavho (lushie) wa maḓuvha a mahumi mavhili. Tshiwo itsho tsho bvelela kusini kuṱuku kwa Tshidaulu, Mbilwi vhuponi ha Sibasa.
Uya nga muambeli wa mapholisa a Limpopo, Vhokholonele Malesela Ledwaba, vhari tshiwo itsho tsho bvelela nga Lavhuvhili ḽa fumi-mbili Khubvumedzi. Muhumbulela vhovha vho eḓela na ṅwana wavho wa musidzana wa minwaha ya fumi-rathi lufherani luthihi na vhanwe vhana vhavho. Mme a lushie uyo ori a tshi vuwa nga matsheloni nga awara ya vhuṱanu uri a ḓi lugisele uya tshikoloni, a mangala lushie lwawe lu siho mmbeteni. Vho ṱoḓa ṅwana vha balelwa u mu wana. Muhumbulelwa vha ya vha vula mulandu wa muthu o ngalangalaho tshiṱitshini tsha mapholisa Ṱhohoyanḓou vho imela ṅwana wavho sa izwi a tshe muṱuku.
"Mapholisa vho thoma u sedzulusa mulandu uyo, makhulu a muḓulu vha founelwa kha ṱhingo yavho. Vha zwifhela mapholisa uri vhone vho vha vhe mushumoni Levubu. Tsedzuluso dza mapholisa dzo bvela phanḓa u swika vha tshi wana uri muhumbulelwa vhovha vhe siho mushumoni hone vho vhonala vha khou tshimbila na bege, he vha fhelela muḓini u sa ḓivhei kha kusi uko. Ho dovha ha itwa tsedzuluso kha vhupo uho vhe na thuso ya yunithi ya dzi mmbwa dza Makhado K9. Lushie lwo fhedza lwo waniwa o laṱiwa nḓuni isadzuliho muthu fhedzi a songo huvhala," hu amba Vho Ledwaba.
Muhumbulelwa vhori vha tshi sengiswa nga Lavhuna ḽa fumi-nṋa Khubvumedzi, vha tenda uri vho tswa muḓulu uyo nau laṱedza vhuṱala nga u zwifhela mapholisa. Vho mbo ḓi farwa nga mulandu wa u zwifhela vha mulayo na u tswa ṅwana. Tshivhangi tsha uri vha tswe ṅwana a tshi athu u ḓivhea, fhedzi ṱhoḓisiso dza mapholisa dzi khou bvela phanḓa. Mulandu wavho wo fhiriselwa kha ḽa furaru-thihi Tshimedzi uri mapholisa vha bvele phanḓa na tsedzuluso dzavho nauri muhumbulelwa vha ḓi ṱoḓele vhaimeleli vha mulayo.
Zwa zwino ṅwana o vhuiselwa kha mme awe.
Thama ya muṱa ya tsini, we asi ṱoḓe u ambiwa dzina, uri vhathu vha na mihumbulo ya u fhambana nga ha tshivhangi tsha u tswiwa ha ṅwana. "Vhanwe vhari vhovha vha tshi ṱoḓa u nea mufunwa wavho ṅwana sa izwi vhovha vho mu vhudza uri vha muimana, vhanwe vhari vhovha vha sa takaleli uri ṅwana wavho u na ṅwana a tshe muṱuku. Ngeno vhanwe vha tshi khou humbula uri vhovha vha tshi ṱoḓa u mu ita tshiṱhavhelo. Na rine a rina vhuṱanzi uri ndi ngani vho mu tswa." vha amba.
Vho Mpandeli Tshivhonammbi, muthusa-muṅwaleli wa dzanganao ḽa SANCO ya Mbilwi, vhari tshiwo itshi tsho sia vhadzulapo vha na nyofho na dzi mbudziso. "Ro pfa maambiwa manzhi nga ha tshiwo itshi, hone vhanwe vha humbulela uri ndi ngauri muhumbulelwa vhovha vho nyamiswa nga uri ṅwana wavho ovha na ṅwana atshe muṱuku. Ri dovha hafhu ra eletshedza vha muṱa uri vha wana thuso yo fanelaho uri vha thusalee kha zwe vha ṱangana nazwo," vha amba.