Tshiṱori nga Silas Nduvheni. Ṱhalutshedzo nga Khathutshelo Raliphaswa.
Makhulu Vho Tshinakaho Mulovhedzi, vhe vha fara 100 nga ḽa 21 Ṱhangule, vha na maitele o leluwaho a vhutshilo vhulapfu: u dzula u tshi khou shuma, u ḽa, u iledze halwa na ma bepha a vhusiku vhuhulu. Nyeletshedzo yavho yo bva mbiluni nga tshifhinga tsha vhuṱambo havho ha ḓuvha ḽa mabebo ḽa vhu dana nga Mugivhela, ḽa 4 Tshimedzi, muvhunduni wa Ngovhela Back Side tsini na Phiphidi, nnḓa nyana ha ḓorobo ya Thohoyandou.
Naho hu na mutsho u rotholaho na u vhusuṱo, vhaḓuhulu, mashaka, na miraḓo ya tshitshavha vho kuvhangana u itela u hulisa mudzulapo wa kale wa muḓi nga dzi khuwa, u vhanda zwanḓa, u imba, na u tshina kha mafhungo madifha na nyimbo dza sialala dza Tshivenḓa.
Vho bebwa nga 1925 nahone vha alutshela Vuvha la Mulambilu vhuponi ha Nzhelele, Vho-Makhulu Mulovhedzi vho sumbedza maḓipfele o fhambanaho kha tshifhinga tshavho tsha u thoma. "Ndo vha ndi tshi ḓo takalela u pembelela ḽeneḽi ḓuvha na vhananga vhaṋa, fhedzi vhoṱhe vho no fhira fhano shangoni," vha ralo, vha tshi humbula nga ha maṅwe a maḓuvha a takadzaho vhukuma vhutshiloni havho.
Musi vha tshi khou amba na vhaḓuhulu vhavho, mashaka, na vhane vha vha tamela mashudu vhe vha vha vha tshi bva tsini na kule, vho vha vha tshi ṋea nyeletshedzo yavho nga u tshila tshifhinga tshilapfu: "Litshani u nwa halwa ho kalulaho, iledzani u dzula ni tshi tshimbila masiku, nahone ni sendele kule na mutsiko wa zwifhio na zwifhio. Vhathu vhanzhi vha fa vha tshee vhaṱuku ngauri vha nyadza vhulivhisi ha vhahulwane," vho ralo.
Makhulu Mulovhedzi vha dzula vha tshi khou shuma nahone vha na mutakalo. Kha miṅwaha ya makole a 100, vha kha ḓi kona u bika, u amba zwavhuḓi, u tshimbila, na u shuma ngadeni yavho ya miroho ya murahu ha nnḓu, vha tshi khou ṱhogomela mafhuri, khavhishi, na tshipinitshi. "U vuwa matsheloni maṅwe na maṅwe u itela u shuma ngadeni yanga zwi ita uri ndi dzule ndo khwaṱha" vha engedza.
Ndi takalela vhuswa, mashonzha, na nzie, nahone a thi vhuyi nda nwa halwa," vho ralo, vha engedza nga uri vho vhona nḓila ine vhaswa vha nwa ngayo vhumatshelo havho.
Vhuṱambo ho dovha ha bvisela khagala vhushaka ha muṱa wavho, u ṱumanya muṱa wa Mulovhedzi ngei Ngovhela na mashaka a Mulele (Nzhelele), Muledane, Shayandima, Matangari, Vuvha la Mulambilu, na Mbilwi.
Muraḓo o ḓikumedzelaho wa Kereke ya Kaṱoḽika ya Roma ya henefho, ndi kale vha tshi tikedza tshitshavha tsha havho nga vhulivhisi na thuso ya zwa dzitshelede. U imela vhaḓuhulu vhavho, Vho-Matamela Mulovhedzi vho ṱalusa makhulu wavho sa mme na khotsi avho vhe vha vha vha tshi khou vha ṱhogomela na vhana vhavho nga murahu ha musi vhabebi vhavho vho no lovha, na u vha khoḓa nga u ṱanganya muṱa na tshitshavha.
Makhulu Mulovhedzi vha na vhaḓuhulu vha rathi na vhaḓuhuludulwana vha 14.