Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Musidzanyana wa miṅwaha ya fumi-rathi we a vha a tshi vhonala o shavha hayani oya u dalela khonani yawe ya musidzana, o ḓou lifha "mulandu" uyo nga nḓila i vhavhaho. O rwiwa luhulu nga malume awe, nahone a lovha nga murahu ha musi o no swika hayani hawe. Hu pfala zwauri malume awe vhovha vha tshi ita nau mu humbulela uri u na tshanḓa kha u lovha ha vhadzulapo vha bvaho Zimbabwe vhane vha dzula henefho muvhunduni.
Mufunwa Mphephu o bva hayani hawe muvhunduni wa Ngovhela nga Mugivhela wa la malo Luhuhi, a songo ḓivhadza mirado ya muta nga ha hune a khou livha hone. Musi maḓuvha a tshi khou ḓi ya, muṱa wawe wo vha u tshi khou ḓi ṋaṋa u vhilaela sa izwi ovha a sa khou vhonala. Nga Ḽavhuvhili ḽa ino vhege, malume wawe na khonani yavho vho mbo ḓi ṱuwa vha tshi khou ṱoḓa u mu ṱoḓa miḓini.
O fheleledza o wanala kha luṅwe lurumbu lwa muvhundu e na khonani yawe. Nga murahu ha u farwa, malume wawe na khonani yavho, hu pfi vho vha vhe mufuda wa u ṱarafa, vho vha vha tshi tshintshana u mu rwa musi vha tshi khou mu ṱana zwiṱaraṱani.
Vhukati ha zwenezwo, musidzana o rwiwaho luvhi o gungula uri ha tsha kona u tshimbila nahone a fanela u hwalelwa hayani. Musi o no swika hayani, o mbo ḓi ṋewa zwiḽiwa fhedzi nga murahu a wa nahone a lovha. Zwe zwa mangadza ndi zwauri vhahumbulelwa vho mbo ḓi hwala tshitumbu tshawe vha dzhena nḓuni.
Nga murahu ha lufu lwawe, malume vho vhudza miraḓo ya muṱa uri vho rwiwa nga vhadzulapo vha Zimbabwe. Naho zwo ralo, mapholisa vho vha vha tshi khou solisea na u vhudzisa mashaka. Nga murahu ha u dzhia zwitatamennde, vho ḓou fara malume avho.
Lufu lwawe lwo sinyusa miraḓo ya tshitshavha sa izwi yo fukedzwa nga tshiphiri na u humbulela, hu tshi khou bvelela maambiwa au fhambanaho.
Mme a Musidzanyana uyo, Vho Anza Mphephu, vho amba uri vha kundelwa u ṱanganedza lufu lwa ṅwananyana wavho.
"Ndo vhaisala nahone ndi kha vhuimo vhu konḓaho. Ndi nga si tende uri ṅwananga o no ṱuwa nga nṱhani ha vhathu vha sa ḓivhi. Ndo wana mafhungo a ṱungufhadzaho nga iri ya 19:00 nda gidimela Ngovhela u bva hayani hanga ngei Hamutoti. Tshithu tsha u thoma tshe nda tshi ita ndi u lingedza u mu vusa, ndi tshi fulufhela uri u ḓo vhuya vhutshiloni. Ndi khou pfa vhuṱungu, zwihuluhulu ngauri vhavhulayi [vhane vha khou humbulelwa] ndi vhathu vha re tsini hanga," vha amba ngauralo.
Vho dovha hafhu vha landula mafhungo a uri vho ṋea vhahumbulelwa thendelo ya u kaidza ṅwananyana wavho fhedzi nga nḓila ine ya pfesesea isa vhuhali hauralo.
"Ndi nga tendela hani vhathu vha tshi vhulaha ṅwananyana wanga? Ndi a zwi ḓivha uri ovha o khakha, nahone ndo lingedza lunzhi-lunzhi u itela u mu livhisa khandila yoteaho. Zwe zwa itea ndi u fhira tshikalo. Ndi khou tou vhofholowa uri muhumbulelwa zwino u khou vhewa dzhele. Nga fulufhelo, khothe, i ḓo ṱalutshedza uri ndi ngani o shumisa phaiphi ya tsimbi u itela u mu 'mulaya'," mme vha amba izwo.
Muambeli wa mapholisa wa Limpopo Vho Colonel Malesela Ledwaba vho khwaṱhisedza uri muhumbulelwa wa minwaha ya furaru-raru o fariwa na u hweswa mulandu wa u rwa na u vhulaha. Vho dovha vha khwaṱhisedza uri muhumbulelwa ndi malume wa musidzana o lovhaho.
"Musi a tshi wana musidzana, muhumbulelwa o vha e na vhushaka nae, nahone vhuimo ha ṋaṋa. O mbo ḓi mu rwa nga tshihali. Mupondwa o lingedza u shavha fhedzi a wa a kundelwa, nahone malume wawe vha mu hwalelwa murahu hayani. Mme a mupondwa vho vhidza tshumelo dza zwa ngalafho dza shishi, vhe, musi vha tshi swika, vha ḓivhadza uri Mufunwa o lovha," vha amba.