Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Muṅwe muswa ane a bveledza zwa fesheni a bvaho Madombidzha u khou dzhena nga zwiṱuku nga zwiṱuku kha nḓowetshumo ya u bveledza zwiambaro zwine zwa kunga maṱo a vhathh. O thoma bindu lawe nga tshifhinga tsha u valelwa ha vhathu dzinḓuni nga ṅwambo wa Covid-19 nga 2020, fhedzi zwino mvelele yawe ya zwiambaro, S7FW Apparel, yo aluwa ya vha bindu ḽo dzikaho.
Maanda Masala ndi muinzhiniyara wa zwa nḓowetshumo nga mushumo wawe we a tou gudela gudedzini. Nga murahu ha u ṱhaphudza maṱiriki ngei tshikoloni tsho ṱanganelaho tsha Muthuhadini, o ḓou ya u bvela phanḓa na pfunzo dzawe gudedzini ḽa Yunivesithi ya Thekhinoḽodzhi ya Vaal (VUT).
Musi a tshi kha ḓi vha tshikoloni, o ḓou thoma uvha na dzangalelo kha zwa fesheni, nahone a ḓidzhenisa kha phareidi dza fesheni nahone a ita na u eletshedza khonani dzawe uri vha ambare mini hone nga nḓilaḓe. O vha e na vhutsila ho khetheaho ha u ṱalula malabi o teaho vhukuma na u ṱangana ha mivhala kha zwiambaro.
Masala o amba uri muṱa wawe na khonani dzawe vho vha na mushumo muhulwane kha u thusa bindu ḽawe uri ḽi aluwe musi a tshi dzhia tsheo ya u dzhena kha nḓowetshumo ya u ita zwiambaro zwa fesheni. O engedza nga uri: "Ndo vha ndi tshi rengisela vhathu vhane nda vha ḓivha na vhane nda sa vha ḓivhe, nahone maga yashu ya aluwa." Zwo mbo ḓi vhonala uri nḓila ine Masala a takalela ngayo tshitaila yo vha i tshi takadza vhaṅwe vhathu vhanzhi. Khonani dzawe dzo thoma u vhidza zwiambaro zwawe "S7FW."
"Sa rainzhiniara, ndo shumisa vhutsila hanga u itela u sika zwithu zwiswa. Ndo thoma S7FW Apparel, nda thoma nga zwiambaro zwa u tamba na dzi mask. Vhubvo hanga ha vhuinzhiniere ho nthusa u dzudzanya maitele, u khwinisa mveledziso, na u ṱuṱuwedza vhubveledzi," a ṱalutshedza.
Masala u tenda zwauri hu na vhukoni vhunzhi vhu sa athu shumiswaho kha tshiṱiriki tsha Vhembe. "Hu na zwikolo zwinzhi zwa u ita zwiambaro fhano Vhembe, fhedzi vhane vha ṱhaphudza kha zwenezwi zwiimiswa vha fhedza vha sa iti tshithu vhutshiloni," a engedza.
U tenda uri mihumbulo yavhuḓi i thoma zwiṱuku nahone i ḓitika nga bono ḽa muthu nga eṱhe. U bva henefho, vha sika madavhi vha ya kha vhuṅwe vhupo, fhedzi zwi dzhia tshifhinga. "Vhathu vha Vhembe vha na vhukoni ha nṱhesa nahone vha kha vhuimo vhune vha nga ita uri zwithu zwi bvelele vho ḓiimisa nga vhoṱhe," a amba.
"Dzhiani tshikhala, ni ḓikumedzele nga maanḓa, nahone ni shandukise vhutshilo haṋu. Nahone ni songo lindela zwikhala — sikani inwi mune, uya vhina.