Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Muṱa wa ha Rathidili wa fhala Tshikwani kha ḽa Ha-Sinthumule, wo kwashekana dzi mbilu nge nwana wavho we a ngalangala nga ḽa fumbili ṱhanu ḽa Ṱhafamuwe, tshitumbu tshawe tsha wanala tsho papamala fhaḽa sworedzhini ya Louis Trichardt (Tshitandani), nga ḽa ina ḽa Lambamai.
Mashudu Rathidili we avha ena miṅwaha ya 24, o ngalangala e ḓoroboni ya Tshitandani. Musi vha tshi vhona a sa vhonali, muṱa wo vula mulandu mapholisani wa u ngalangala ha muthu. Miraḓo ya tshitshavha yo guduba hoṱhe he a fhedzisela u vhonala hone, zwe vhutoto. Musi tshitumbu tshawe tshi tshi wanala, tshovha tshono tshinyala.
Khotsi awe Vho-Moses Rathidili, vhari lufu lwa nwana wavho alu pfesesei.
"Ri tshe ro tshuwa ngauri ro sedza hoṱhe, na henefho he a wanala hone roya, fhedzi rovha ri sa ḓivhi uri u henefho. Ri pfesesa uri o vhulahelwa hunwe fhethu, tshitumbu tshawe tsha tou poswa hafho sworedzhini u ngalangadza vhuṱala. Fhedzi arina vhuṱanzi. Zwine ra zwi ḓivha ndi uri ha tsha tshila. Mapholisa ndi vhone vhane vha ngari tandululela heḽi fhungo," vha ralo Vho-Rathidili.
Vhamusanda vha uvho vhupo Vho-Mbulaheni Ramabulana vhari vhadzulapo vhori upfa upfi Mashudu o ngalangala, vha thoma mafulo a u mu ṱoḓa, fhedzi zwa bala. Vho vha vho lavhelela uri u ḓo wanala a tshi kha ḓi tshila. Vhari vha livhuwa vhuḓifari ha vhadzulapo kha heḽi fhungo. Vha fhedza ngauri vhaḓivhi ndi vhone vhane vha ḓo vha vhudza uri ho itea mini.
Muambeli wa mapholisa vha Makhado Segeni Irene Radzilani, vho khwaṱhisedza uri tshitumbu tsha Mashudu tsho wanala sworedzhini tshono ḓi tshinyala. Vhari vho vula mulandu wa tsedzuluso kha heli fhungo.