Tshiṱori nga: Musina Budget. Ṱhalutshedzo nga: Khathutshelo Raliphaswa.
Kha mugaganyagwama wa gidimbili fumbiliraru na gidimbili fumbiliina we wa ṋewa nga masipala wa Musina nga Ḽavhuna ḽa fumbili ṱahe. Ho ṋeiwa nḓivhiso ya uri vhadzulapo vharengi vha vhupo ha masipala wa Musina vha ḓo ṋeiwa miṅwedzi miraru yau badela zwikolodo zwavho hone na luafhulelo lwa phesenthe dza fuṱhanu.
Kha tshipitshi tshavho tsha mugaganyagwama ngei Nancefield Multipurpose, Neḓorobo Vho-Godrey Nkhanedzeni Mawela vho amba uri vhadzulapo vharengi vha fanela uḓi ṅwalisa u wana luafhulelo ulu. Uḓi ṅwalisa kha luafhulelo ulu zwi ḓo guma nga ṅwedzi wa Khubvumedzi ṅwaha-uno.
Vho-Mawela vhari tshumelo iyi iḓo thusa masipala u vhuyedzedza hafu ya masheleni a fhiraho miḽiyoni dza fuṱhanu dza dzi rannda, ane vharengi vhane vha koloda vhaa koloda.
Vha tshi engedza, Vho-Mawela vho ṱahisa tshikolodo tshine vha masipala vha koloda Eskom. " Ubva nga Ḽara ṅwaha wa gidimbili fumbilithihi hu tshi thoma vha khoro ntswa, vha masipala wa Musina vhovha vha tshi koloda vha Eskom masheleni a swikaho miḽiyoni dza furathi ya dzi rannda. Nga ṅwedzi wa Fulwi ṅwaha wo fhelaho, ro kona u fhungudza masheleni ayo nga miḽiyoni dzi swikaho fumbili, ra salelwa nga tshikolodo tsha miḽiyoni dza fuinarathi. Zwa zwino, ro salelwa nga miḽiyoni dza fumi rathi. Ri fulufhela uri ṅwaha-uno u tshi fhela ri ḓovha ro no badela masheleni a swikaho fumi wa miḽiyoni wa dzi rannda nga ṅwedzi wa Fulwana. Ra fhedzisa nga u badela miḽiyoni ya rathi nga ṅwedzi wa Nyendavhusiku ṅwaha-uno."
Vho-Mawela vho eletshedza tshitshavha tshiwelaho fhasi ha masipala wavho uri vha shumise nomboro dza lushaka dza ulwa na tshinti na vhugevhenga u vhiga milandu na tshanḓa-nguvhoni. Nomboro iyo ya lushaka i shumiswa u vhiga milandu ire kha vhupo ha Masipala wa tshiṱiriki tsha Vhembe, Musina, Thulamela, Collins Chabane, na masipala wa Makhado.
Uri tshumelo iye kha lushaka nga tshihaḓu, Vho-Mawela vhari zwikhala zwa mishumo zwine ahuna vhathu zwi ḓo fanela u ḓadzwa. Vhari, "Lwa vhege mbili dzo fhiraho, ro ita dzi khunguwedzo dza zwikhala zwi swikaho furathi-ṱhanu zwine zwa ṱoḓa vhathu. Ho dovha hafhu ha itwa khunguwedzo ya zwikhala zwa furaru-raru zwa nga ngomu. Zwo rali, huna zwikhala zwa fuṱahe malo zwine zwa fanela u ḓadzwa nga tshihaḓu."
Vho-Mawela vho amba na nga ha mishumo yo fhedzwaho na miswa ya nwaha wa masheleni u ḓaho.