Tshiṱori nga: Musina municipality. Ṱhalutshezo nga: Khathutshelo Raliphaswa.
Vhaimeleli vha Eskom vho ṋea vha vha masipala wa Musina tshiphuga tsha tshipentshele vha tshi vha livhuwa u kona havho u swikelela u badela tshikolodo sa zwe vha fulufhedzisa. Vhuṱambo ha uvha ṋea ṱhansiela iyo, ho farelwa kha dzi ofisi dza khoro ya masipala wa Musina nga Musumbuluwo wa ḽa fumbili-malo.
Vhege yo fhiraho, minisiṱa wa zwa mudagasi Vho Kgosientsho Ramokgopa vho anḓadza uri mimasipala ya Afrika Tshipembe yo angaredzwa i koloda vha Eskom masheleni a swikaho biḽiyoni dza furathi-raru wa dzi rannda, hone zwi khou engedzea. Vhari u bvela phanḓa ha zwikolodo izwi zwi nga vhanga uri hu tsimiwe muḓagasi nga vha Eskom.
Nga ṅwaha wa gidimbili fumi-sumbe, vha masipala wa Musina vhovha vha khou koloda masheleni a swikaho miḽiyoni dza ḓana fumi-ṱhanu, hone ha lukiwa maano a u dzudzanya nḓila dza u badela masheleni ayo. Nga ṅwaha wa gidimbili-thihi vho ḓou fhungudzelwa miḽiyoni dza fumbili kha e avha o sala, vha salelwa nga miḽiyoni dza funṋa-rathi khoma ṱahe ya dzi rannda.
Kha tshipitshi tsha neḓorobo Vho Nkhanedzeni Godfrey Mawela nga ṅwedzi wa Fulwi, vhori masipala vha koloda masheleni a swikaho fumi-rathi khoma ṱahe wa dzi miḽiyoni wa dzi rannda. Zwa zwino tshikolodo itsho tsho badelwa tsho fhela, vho tou salelwa nga u badela akhaunthu yavho zwa zwino.
Vha tshi ṋeiwa ṱhanziela iyo, Vho Mawela vhari vha a ḓi hulisa sa masipala uri vho swikelela zwine mimasipala minzhi ya kundelwa u swikelela. "U kona u badela murahu masheleni aya zwi ṋea vha Eskom maanda a uri vha imise u khaula muḓagasi na u bveledzisa vhupo hashu, sa izwi masheleni o badelwaho a tshi ḓo shumiselwa dzinwe tshumelo dzine vha fanela u swikisa vhathuni."
Vho Mawela vha livhuwa vha mugodi wa De Beers Venetia, moḽo wa Musina, Tiger Brands, M-Pak na vha Matshavha Holdings, vharengi vhavho vha nṱha vhane vha shumiwa akhaunthu dzavho dza masipala nga nḓila kwayo navhanwe vho rambiwa uvha tshipiḓa tsha vhuṱambo uvhu. Vho dovha hafhu vha livhuwa vharengi vhane vha khou badela masheleni avho nga tshifhinga, na u ṱuṱuwedza muthu munwe na munwe uri vha badele tshumelo dzavho dza a masipala.
Mulangi wa Eskom ya Limpopo na Mpumalanga, Vho Collin Reddy, vho livhuwa masipala wa Musina kha u lifha masheleni, vhari u swikelela havho izwi nga zwivhe ṱhuṱhuwedzo kha zwinwe zwiimiswa na mimasipala u mona na shango.