Tshiṱori nga: Mafhungo a Musina. Ṱhalutshedzo nga: Khathutshelo Raliphaswa.
Masipala wa Musina wo pfufhiwa uvha wone masipala ure na vhatevheli vhanzhi kha zwileludzi zwa vhudavhidani. Vho pfufhiwa kha vhuṱambo ha pfufho dza lushaka dza South African Local Government Association (SALGA). Vhuṱambo uho ha dzi pfufho ho farelwa Nkosi Albert Luthuli International Converntion Centre (ICC) ngei Durban nga Musumbuluwo wa ḽa fumi-na-nthihi Nyendavhusiku.
Kha mimasipala ya Limpopo, masipala wa Musina wovha wone u woṱhe we wa pfufhiwa kha vhuṱambo uho. Vho Wilson Dzebu, mulangi wa vhudavhidzani kha masipala wa uyo, vhari vha pfa vho hulisea ngau pfufhiwa tshiphuga itshi, vhari zwi sumbedza uri mushumo wavho u khou vhonala. Vho Dzebu vhari naho vha tshi touvha na vhashumi vhavhili fhedzi kha ofisi ya vhudavhidzani kha masipala uyu, vha shuma vho ḓi nekedzela kha uvha na vhudavhidzani ha khwine na vhadzulapo.
Vho Dzebu vhari u pfufhiwa havho nga tshiphuga a zwongoḓa sa tshimangadzo khavho, izwi ndi ngauri mushumo wavho wovha wo noḓi huliswa nga vha muvhuso wa vunḓu ḽa Limpopo zwi tshi tevhela nḓila dzavho dza vhudavhidani. Masipala uyu asi kale vho humbelwa u sumbedzisa nḓila dzavho dza vhudavhidzani kha vha vhudavhidzani ha Limpopo kha vhuṱambo ha zwa vhudavhidzani ha vunḓu.
Vha masipala uyu vha shumisa WhatsApp na Telegram u davhidzana na vhathu. Siaṱari ḽavho ḽa Facebook ḽina vhatevheli vha paḓaho 149,000, hune vha nea vhathu nḓivhadzo ḓuvha ḽinwe na ḽinwe. Vha vhudavhidzani kha masipala uyu, vhane vhavha Vho Dzebu na mushumi muthihi, vha rumela vhadzulapo milaedza i paḓaho zwigidi zwiṱanu uri vha ḓi ṅwalisele kha masipala wavho. Masipala wa Musina u dovha hafhu wavha wone u woṱhe ure na tshanele ya WhatsApp ye ya sikwa ṅwedzi wo fhelaho, ine zwa zwino i na vhatevheli vha paḓaho zwigidi zwivhili. Vha dovha hafhu vha bveledza dzi posiṱara ngomu masipala huu itela u ḓivhadza vhathu kha masiaṱari o fhambanaho a vhudavhidzani.
Vho Dzebu vhari vha eletshedza mimasipala uri vha tshimbile na zwifhinga kha masia a vhudavhidzani na vhadzulapo. Vha shumise zwikhala na zwishumiswa zwine vhavha nazwo.