Thiṱori nga: Silas Nduvheni: Ṱhalutshedzo nga: Khathutshelo Raliphaswa.
Hovha na bembela ḽihulu kha vhadzulapo vha kusi kwa Ha-Siḓou, hu tshi ḓadziwa mativha nga Vhamusanda Vho-Nthuseni Sithali nga Mugivhela wa 8 Ṱhafamuhwe. Dakalo kha avho vhadzulapo ḽo engedzwa ngauri Ha-Siḓou ho fhela miṅwaha ya ṱahe hu sina Vhamusanda.
U bva nga 2015 hu tshi dzama muṱahabvu Vhamusanda Vho-Nngwedzeni Sithali, Ha-Siḓou hovha huna khosi pfareli yau ranga vhathu phanḓa. Izwi zwovha zwi tshi vhilaedzisa vhadzulapo sa izwi vha na dzi mbilaelo dzine vhovha vha sa thusalei khadzo.
Nga ḓuvha ḽa u ḓadziwa ha mativha, nga Mugivhela, ho mvumvuswa maḓana na maḓana a vhathu vha Ha-Mphaphuli fhasi ha Thovhele Vho-Gole Mphaphuli nga Tshikona.Vho-Mphaphuli vhari kusi aku bveleli zwavhuḓi hone na mulalo ahuna kha kusi ku sina Vhamusanda vha u ranga phanḓa vhathu.
Thovhele Vho-Mphaphuli vho eletshedza Vhamusanda uri vha farisane na vhadzulapo kha u ḓisa thandululo kha dzi thaidzo dzine mivhundu ya ṱangana nadzo, u fana na u tambudzwa nga mbeu na u vhulawa ha vhana na vhafumakadzi. Vho dovha hafhu vha eletshedza vhadzulapo uri vha ṱhonifhe Vhamusanda hone na kha zwine vha ita, vha dzulele uvha tikedza zwi tshi itela u khwinifhadza mivhundu yavho.
Vha muhasho wa zwa sialala fhano vunḓuni ḽa Limpopo, Vho-Mmbulaheni Mamidza vho nea Vhamusanda Vho-Nthuseni Sithali ṱhanziela yau faedza uri vho lugelwa uvha Vhamusanda nau rangaphanḓa Ha-Siḓou.
"Ndi vha eletshedza uri vhavhe murangaphanḓa ane avha na ṱhonifho kha vhathu vhavho. Vha range vhathu vhoṱhe nga nḓila ya u fana. Vhadzulapo vha fanela u ḓiselwa tshumelo ya khwine, hone vha farisane na vha masipala uri tshumelo i ṱavhanye u ḓa kha vhathu" hu amba Vho-Mphaphuli.