Tshiṱori nga: Silas Nduvheni. Ṱhalutshedzo nga:Khathutshelo Raliphaswa.
Mativha a Nngwenani Ha-Themeli, tsini na Ngovhela, o ḓadzwa Vhamusanda Vho-Ratshinyiwaho Themeli vha vhuvhili nga Mugivhela wa ḽa fumbilisumbe. Mushumo uyo wo loshwa nga maḓana a vhathu mudavhini wa Themeli vha tshi vhona u ḓadzwa ha mativha.
Thovhele Vho-Mailausmbwa Miḓiyavhathu Tshivhase, vhe vha rangaphanḓa mushumo uyu vhari Vhamusanda vho ḓadzaho mativha vha ḓo vhidwa Vho-Ratshinyiwaho.
Thovhele Tshivhase vhari u lwela vhuhosi ndi zwithu zwo ḓoweleaho kha dzinwe tshaka. Vha kaidza dzi tshaka uri vha ṱutshele zwiito zwau lwela vhuhosi sa izwi zwi tshi lengisa tshumelo uya vhathuni."Vhadzulapo vha ṱoḓa tshumelo ya maḓi, muḓagasi na magondo a khwine, fhedzi arali huna u vhangisana ha vhuhosi ahuna ane avha na thendelo yau ranga tshitshavha phanḓa na u vhusa vhadzulapo. Mativha a Ngwenani Ha-Themeli o ḓadzwa, hone vhamusanda vho vhewaho u ranga vhadzulapo phanḓa ndi vhamusanda vho fanelaho. Vhathu vha fanela uvha ṱhonifha na khoro yavho," vha zwa.
Thovhele Tshivhase vho eletshedza Vhamusanda uri vha hangwele vhathu vhe vha lingedza uvha lwisa kha vhuhosi havho na uvha isa khothe, vha tshi vha pomoka uri a vhango tea uvha Vhamusanda. Avha lwele u shuma na vhadzulapo u ḓisa mveledziso kha muvhundu wavho.
Vho-Lavhelesani Themeli, vhe vhavha vha khosi pfareli, vhari vho takala uri dzi khuḓano nga ha vhuhosi dzo fhela, mativha o ḓadzwa nga Vhamusanda Vho-Ratshinyiwaho Themeli vha vhuvhili, zwo fanela.
Vho-Lavhelesani vhari: "U xa ha mativha nga ṅwaha wa gidimbili fumbili, hu tshi dzama munnaavhane Vhamusanda Mugowashango Themeli, zwovha zwikonḓaho kha nne, sa izwi hovha na u lwela vhuhosi. Ndi kale ndi tshi ṱoḓa uri u lwa musanda zwi fhele, ndia takala u lwa ho fhela."
Vhari vha ḓo tikedza nau shuma na Vhamusanda Vho-Ratshinyiwaho Themeli vha vuvhili.