Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Vhadzulapo vha kusi kwa Tshiungani na zwisi zwa tsini zwa Mabvete, Masea, Madimbo, Tshikhudini, Masisi, Tshirenzheni na Bende Mutale, zwine zwa wela fhasi ha masipala wapo wa Musina, vha khou humbela thuso kha muvhuso uri vha vha thuse na u vha lilisa nga murahu ha u tshinyalelo kha ndaka dzavho kha maḓumbu an mvula khulu ye ya bvelela nga madekwana a Ḽavhuraru ḽa fumbili-sumbe Khubvumedzi.
Uya nga muvhigo we wa netshedzwa nga masipala wapo, vhari miṱa i fhiraho ya ḓana vho tshinyalelwa zwi tshi tevhela maḓumbu.Ṱhanga dza dzi nnḓu dzo fuḓuluwa, thanda na zwi bogisi zwihulwane zwa muḓagasi dzo tupuwa. Muvhundu we wa kwamea zwihulu ndi wa Tshikhudini, he ha swika na zwifhango. Ovha mashudu mavhuya ngauri ho huvhala vhathu vhavhili fhedzi, wa Tshikhudini na wa Tshirenzheni, vhe vha fhedza vho hwalelwa vhuongeloni u wana thuso yo teaho.
Vhalimi vhapo, vhari vho xelelwa vhukuma sa izwi ho tshinyadzwa zwibveledzwa zwine zwa anganyelwa uvha zwa maḓana a zwigidi nga dzi rannda nga tshifhango. Munwe wa vhalimi vho xelelwaho, Vho Mike Makushu, vha u bva Tshiungani, vha tshinyadzelwa zwiendedzi zwi mivhili na mafasiṱere a nnḓu yavho nga tshifhango. Vhari nga nnḓa ha izwo, phiriphiri dzavho dzi swikaho hekhithara nna na maṱamatisi e vha vha vha khou kana o tshinyadzwa.
"Ndo xelelwa zwihulu. Ro fhedza minwedzi i swikaho miraru ri tshi sheledza na u ṱhogomela zwimedzwa zwashu, hone zwovha zwo no lugela u kaniwa, ra bvelelwa nga tshiwo tshingafha. Rine sa vhalimi, ro vhaisala, fulufhelo ḽashu ndi uri muvhuso u ri lilise nga u lozwa hashu. Arina masheleni a u thoma fhasi hafhu. Vhanwe vhalimi vhovha vho koloda na masheleni hone zwino a vha na nḓila dza u a humisela murahu nga tshinyalelo iyi. Vhupo hashu vha fanela u vhidzwa sa vhupo ha tshinyalelo," vha amba.
Vho Wilson Dzebu, muambeli wa masipala wa Musina, vho khwaṱhisedza uri vhupo uho ho ṱangana na tshiwo tsha maḓumbu na zwifhango . "Ro rumela vha tshumelo dza vhulangi ha tshinyalelo uri vha ṱole tshinyalelo na u langa tshiimo tsha vhupo ho kwameaho. Nga thuso ya vha Gift of the Givers, ro kona u thuso vho welwaho nga zwiḽiwa, zwiambaro, vhudzulo ha tshifhinya nyana, vhulalo, na thikhedzo ya muhumbulo," vha amba.