Tshiṱori nga Frank Mavhungu. Ṱhalutshedzo nga Khathutshelo Raliphaswa.
Thimu dzine dza ḓo imedzana kha mitambo ya 32 kha muṱaṱisano wa Nedbank Cup dzo ḓivhadzwa ofisini dza Nedbak ngei Sandton, nga Lavhuna ḽa ṱahe Phando nga madekwana. Thimu mbila dzine dza bva Vhembe dzi tshe kha muṱaṱisano uyu, thimu ya Mpheni Defenders na Venda Football Club (VFC), dzine dza ḓo tamba kha mitambo ya uvula hayani hadzo.
Thimu ya VFC iḓo tamba na thimu ine ya wela kha vhugwena ha Motsepe Foundation ya Cape Town Spurs, ngeno thimu ya Mpheni Defenders i tshi ḓo tamba na thimu ya Hungry Lions. Thimu idzi dzi ḓo tamba mitambo ine yo vhetshelwa u tamba ubva nga ḽa fumbili-ina (24) u swika fumbili-rathi (26) Phando. Naho hu songo bulwa fhethu hune thimu idzi dza ḓo tamba hone na datumu musi tshiṱori itshi tshi tshi ṅwaliwa, thimu idzi mbili (Defenders na VFC) dzi khou lavhelelwa u tamba luvhanḓeni lwa mitambo lwa Ṱhohoyanḓou.
Mugudisi muhulwane wa thimu ya VFC Vho Standford Nkoane vha na fulufhelo zwihulu kha vhatambi vhavho uri vha ḓo shumisa mutambo wavho na Spurs sa nḓila yau swika kha mitambo yadza 16 yau fhedzisela. Vho ombedzela zwauri avhangaḓo dzhiela fhasi thimu ya Cape Town Spurs, naho vha tshi khou lwela gundo. Vho Nkoane vho dovha hafhu vha amba zwauri mitambo ya Nedbank Cup aingaḓo vha thithisa kha mitambo ya ḽigi yavho, hune VFC ya khou lwela u wana vhuimo.
Mugudisi muhulwane wa thimu ya Defenders Vho Sydwell Phuravhathu vho ṱahisa uvha na fulufhelo khau shumisa tshikhala tshau tamba hayani uri vha kunde thungo lwa Northern Cape. Thimu iyi ya Mpheni Defenders vho kundiwa kha mitambo yau fhedzisa ya 16 kha thumu ya Chioa United ino tamba kha ḽigi ya Betway ṅwaha wo fhiraho.
Vho Phuravhathu vho engedza zwauri mitambo ya Nedbank Cup iḓo shuma sa tshikhala tshau ṱola uḓi lugisela ha thimu khau aluswa. Munwe wa mutambo une vhathu vho u lindela ndi mutambo wa vhukati ha thimu ya Magesi FC na SuperSport United.