Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
"Ro tou pfa unga ndi muthu a khou tamba nga dzi khirikhethe, fhedzi nga murahu ravho vhona vhanna vhavhili vha tshi gidima u bva kha linwe ḽa mavhengele, vha tshi ita nau thuntsha zwigidi, ndi he ra vhona uri huna zwine zwa khou itea." Ndi munwe wa vhashumi vha mavhengele tserekano a Thavhani nga murahu hau ṱangulwa ha vhengele ḽa Pick 'n Pay nga Mugivhela wa ḽa fumbilisumbe Shundunthule.
Uya nga ṱhanzi ye yazwi vhona nga mato, atshi vhudza vha gurannḓa ḽa Limpopo Mirror asa ṱoḓi bulwa dzina, uri: "mulindi wa tsireledzo ovha atshi khou tou bva u dzhia masheleni a duvha lofhiraho ofisini, ari e hanefho vhengeleni, ha da mavemu mavhili vha mu sumba nga zwigidi vha tshi ṱoḓa masheleni ayo. Vho fhedza ngau dzhia masheleni ayo na tshigidi tshawe tsha mushumo. Mavemu vho fhedza ngau thuntsha vha tshibva nga munango wa mavhengele tserekano."
Sa izwi vhathu vhovha vho tshuwa nau mangala zwe zwavha zwi khou itea, munwe wa vhashumi we avha a khou thusa murengi nga tshifhinga tsha tshiwo itsho, uri ori u pfa u thuntshwa a gidima na murengi vha tshi gidimela ngomu sa izwi vhovha vha sa ḓivhi uri muongo wa zwigidi u bva ngafho. "Ro vhona vhanna vhavhili vha tshi bva na bege, khathihi nau thuntsha vha tshi ṱuwa afho mavhengele tserekano. Zwe nda ṱangana nazwo namusi ndi zwine thiathu vhuya nda ṱangana nazwo, ndo tou pfa ndo vhulungea mapholisa vha tshi swika he ha itea tshiwo," a amba.
Muambeli mufareli wa mapholisa a Vhembe, Vho-Vhonani Lokie Masia, vho khwaṱhisedza tshiwo itshi. "Ro wana muvhingo nga zwine zwa khou itea, ra takutsedza uya hone, fhedzi mashudu mavhi ro wana mavemu vho no ṱuwa. Vhahumbulelwa, vhane ra humbula uri vhovha vha vhaṋa, avha ḓivhei zwa ziwno. Vho vha vha khou tshimbila nga goloi ya Toyota Etios, nga nomboro isa ḓivhei. Ro vula mulandu wau ṱangula, hone ṱhoḓisiso dzi khou bvela phanḓa," vha amba.