Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Mavhengele tserekano a Elim vha husumba honovha tshivhilelana tsha u ṱangulwa nga mavemu, izwi ndi nga murahu ha tshiwo tshe tsha bvelela kha vhengele ḽa Ackermans nga Sondaha ya fumi-ṱahe. U ṱangulwa uho ho bvelelwa nga matsheloni nga awara ya vhufumi he vha ṱangula ṱhingokhwalwa dze dzisi bulwe tshivhalo.
Uya nga muvhigo, vhaṱanguli vho dzhena ngomu vhengeleni sa vharengi zwavho, ndi he vha thoma u shushedza vharengisi nga tshenetsho tshifhinga vha tshi khou ṱangula dzi ṱhingokhwalwa. Vhori vha tshi fhedza vha ṱuwa nga tshiendedzi tsha Toyota Etios tshena ire na nomboro isa ḓivhei.
Vho Patrick Mashau, vhane vhavha muthusa mudzulatshidulo wa komiti ya tshumelo ya tshitshavha kha mavhengele tserekano iyo, vho ṱahisa usa farea zwavhuḓi nga u gonya ha zwivhalo zwa zwiwo zwa vhugevhenga. "Tshivhalo tsha u ṱangulwa tshi khou gonya lwo kalulaho, hone na mapholisa ha vhonali. Ri vhona uri ndi zwa vhuṱhogwa uri ri engedze vhulindi ha tsireledzo, zwi ḓo ṋea vhathu fulufhelo uri vha khou renga kha vhupo ho tsireledzeaho khavho," vha amba.
Mulangi wa mavhengele tserekano, Vho Mpho Madadzhe, vhari nga zwifhinga zwa zwino zwa maḓuvha au awela, mavemu vha anzela u ṱangula mavhengele tserekano. "Nga haano maḓuvha au awela, vharengi vha fanela u ḓi linda musi vhe mavhengeleni hone vha ṱutshele kule na u humbela u thusiwa musi vha tshi bvisa masheleni kha mitshini ya masheleni uri vha si ṱangulwe," vha engedza.
Muambeli wa mapholisa Vho Brigadier Hlulani Mashaba vho khwaṱhisedza tshiwo. "Mapholisa vho vula mulandu wa u ṱangulwa ha bindu, hone vha thimu ya tsedzuluso vha khou bvela phanḓa na u zwimana na mavemu avho," Vho Mashaba vha amba.
Ane avha na zwidodombedzwa zwine zwa nga thusa mapholisa kha mulandu uyu vha nga kwama W/O Muthavhini Jonathan Mberegeni kha 082 319 9629 kana kha nomboro ya lushaka ya u thivhela vhugevhenga ya 08600 10111. Zwo ralo vha ngaya na kha tshiṱitshi tsha mapholisa tsha tsini u isa muvhigo.