Tshiṱori nga Victor Mukwevho. Thalutshedzo nga Khathutshelo Raliphaswa.
Vha komiti ya Khubvi ya zwa shishi (KEC) vho tendelana khauri mavhengele na mavhengele zwao ane a tshimbidzwa nga vhabvannḓa kha vhupo ha Khubvi a vulwe andovhe hafhu arengise hafhu, fhedzi hu na maga ane vho vhetshelwa one uri vha a tevhedze. Zwimauswu na mavhengele ayo ndi ane ovha o valwa zwi tshi tevhela zwe vhana vhovha vha tshi khou vhaisala nga murahu ha uḽa zwiḽiwa zwo rengiwa khavho, he vhaṅwe vha swika khau lovha, hu tshi pfi zwiḽiwa izwo zwi na mulimo khazwo.
Vhege tharu dzo fhiraho, vhana vha tshikolo tsha fhasi tsha Khubvi vhovha vha tshi khou ita misumbedzo kha mavhengele ane avha a vhabvannḓa, vha tshi dzhia zwibveledzwa zwine zwa rengiswa ngomu afho vha tshi laṱa zwiṱaraṱani.
Izwo zwovha zwi tshi khou tevhela zwe ha lovha muṅwe mugudiswa ngavho afho tshikoloni, Munei Mulaudzi wa minwaha ya fumi-raru, we a lovhela vhuongeloni ha tsini nga murahu ha uḽa zwiḽiwa zwe a fhiwa ngamunwe wa mulanguli vhamavhengelo zwao hanefho Khubvi nga Musumbuluwo wa ḽa 21 Tshimedzi. Kha izwo, ndi he vhagudiswa vha murole wa vhusumbe vha ṱahisa u vhaisala havho nga u ṱhasela mavhengele a vhabvannḓa kha kusi kwa Khubvi.
Nga murahu hauri vhadzulapo vha pomoke vha dzangano ḽa South African National Civic Organisation (SANCO) uri vha khou kundelwa u ṱahisa fhungo ḽa uri zwiḽiwa zwine zwa khou rengiswa zwi ngavha zwi na mulimo nga nḓila yavhuḓi, vho ḓou khetha vha KEC uri huvhe vhone vhane vha ṱahisa fhungo iḽi zwavhuḓi.
Komiti iyi ya KEC ndi ine yo vhumbiwa nga Vho Fhatuwani Mudau (mudzulatshidulo), Vho Joseph Livhegwa (Tshanḓa tsha mudzulatshidulo), Vho Freddy Silima (Mufara gwama), Vho Simon Livhegwa (muṅwaleli), na Vho John Nenungwi (Tshanḓa tsha muṅwaleli).
Uya nga Vho Joseph Livhegwa, komiti yo dzhia tsheo yauri, musi mavhengele ayo asaathu u vulwa hafhu, vhane vhao vha fanela u tenda zwauri vha do tevhedza milayo i tevhelaho:
* Mavhengele oṱhe a fanela uvha o kunaho.
* Mitengo i fanela uvha i tshi khou vhonala zwavhuḓi.
* Mavhengele oṱhe a fanela uvha na vharengisi.
* Vharengi vha fanela u neiwa dzi rasithi.
* Mavhengele a fanela u sumbedza mbadelo dzavho dza he vha renga hone zwirengiswa zwavho.
* Hu fanela uvha na vhaṱoli vha zwa mutakalo vhane vha dalela kusi uko luthihi nga ṅwedzi vha tshi ṱola zwiḽiwa zwine zwo fhirelwa nga tshifhinga kha mavhengele oṱhe; a vhabvannḓa na a vhathu vha fhano.
"Rovha na muṱangano na vha komiti na vha SANCO nga Sondaha ya ḽa fumi Lara nga madekwana, he vha dzia tsheo yauri vha ḓo isa fhungo iḽi kha murangaphanḓa wa sialala, Vhamusanda Vho Randima, na vha SANCO, uri vha kone u dzia tsheo ine ya katela vhathu vhoṱhe sa muvhundu. Zwa zwino, mavhengele a vhabvannḓa aḓo dzula o valwa," hu amba Vho Livhegwa.