Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Neḓorobo vha Makhado Vho Dorcua Mboyi na Vhamusanda Ntsundeni Sampson Sinthumule vho farana zwanḓa vha vula mavhengele tserekano hune ha ḓura masheleni a paḓaho miḽiyoni dza tshivhalo wa dzi rannda. Afho ndi kha mavhengele tserekano a zwino-zwino hone ho vuliwa fhaḽa Madombidzha nga Lavhuṋa ḽa fumbili-rathi Khubvumedzi.
Fhethu afho, hune ndi u thoma hu tshi fhaṱiwa zwifhaṱo zwau rali kha vhupo ha vhukovhela ha Vhembe, ho fhaṱiwa nga vha McCormick Group.
Nga tshifhinga tsha u vula Cllr Mboyi vho ṱahisa u takala havho ngau vhona uri hu na mveledziso kha vhupo ha mahayani. Vho amba zwauri Madombidzha mall hu ḓo shela mulenzhe zwihulu khau sika mishumo kha vhadzulapo vhanzhi vha vhupo uho vhane vha na ṱhahelelo ya mishumo.
"Zwa zwino ho fhela zwifhinga zwauri vhadzulapo vha Sinthumule na Kutama vha tshimbile nyendo ndapfu u ya dzi banngani nau renga kha mavhengele au fhambana sa izwi Madombidzha Mall hu na zwinzhi zwine vha ṱhoga," hu amba Vho Mboyi.
Vho Takalani Nemaungani, vhe vhavha vha khou imelela vha McCormick Group, vho bveledza zwauri khamphani yavho yo ḓi lugisela u bvela phanḓa na dzi mveledziso arali hu na mavu au shumela khao. Vho ita nau livhuwa vhafaramikovhe vhe vha tshimbila kha bono lithihi navho musi hu sa athu u fhaṱiwa Madombidzha Mall.
Vhamusanda Vho Ntsundeni Sinthumule, vho ṱahisa u takala havho nga mveledziso iyi, ine ya ṋea vhadzulapo vha Madombidzha na zwisi zwatsini vhutshilo ha khwine. "Hezwi zwi rudza mbilu dza vhathu vhane vhovha vha tshi dzulela u ya doroboni ya Louis Trichardt na Elim u renga hone. Zwa zwino vha nga kona u renga Madombidzha Mall hune ha vha tsini navho, " vha amba.
Vho ita khuwelelo kha vhadzulapo uri vha shele mulenzhe khau ṱhogomela Madombidzha mall nau vhiga havho vhane vhangaita vhutshinyi u fana na u tswa, huu itela uri u vhulungea u itela murafho u ḓaho.