Story by Kaizer Nengovhela & translated by Raliphaswa Khathutshelo
Vhafuwi vha kusi kwa Ha-Kutama ha Makhitha vho sinyuwa vhukuma zwi tshi tevhele u tswiwa ha zwifuwo zwavho nga mafobvu. Vha lingedza nga nḓila dzoṱhe u tsireledza zwifuwo zwavho fhedzi mafobvu aya a dzula ovha rangela phanḓa.
Vhafuwi avha vhari vho nyaga thuso ya mapholisa lunzhi fhedzi phindulo dzine vha dzi wana kha mapholisa ane a sengulusa milandu yavho vha vha ḓisela phindulo dzine a dzi fushi. Vhafuwi vhari vha khou xetsheliwa nga zwigidi zwa dzi rannda zwinzhi hone na zwifuwo zwavho a zwi tsha lalama nga thaidzo iyi, hone na u vhuyeliwa a vha tsha vhuyeliwa kha vhulimi havho.
Munwe wa vhafuwi, Vho-Africa Monyeleteo vha kusi kwa Ha-Makhitha, vhari yo no tou vha nndwa ya ḓuvha na ḓuvha na mafobvu vha tshi lwela zwifuwo zwavho. "Ri khou lwa na mafobvu ane a vhulaya miḽoro yashu ya uvha vhafuwi ḓuvha na ḓuvha. Nga January, mbudzi dzanga dza 20 dzo ngalangala. Ro dzi wana nga murahu ha vhege tharu kha zwiṱaka zwa Muraleni. Nga dzi 2 Ṱhafamuhwe, dzinwe mbudzi dzanga dza 12 dzo dovha dza ngalangala. Ro dzi ṱoḓa kha vhupo ha Ha-Kutama na Ha-Sinthumule, fhedzi na zwino a dzi athu u wanala. Na namusi ahuna muthu ane a khou bva mulomo u wana mbudzi dzanga dzo ngalangalaho. Zwine ri nga vhina kha nyimele heyi ndi uri mbudzi dzanga dzo tswiwa. Ndi humbela uri vhadzulapo vha thuse u wana mbudzi dzanga," vha ralo Vho-Monyeleote.
Vho-Maligana Manyekane vhari lutamo lwavho lwa u vha rabulasi wa nṱha lwo fhelisiwa nga muthu we a vhulaha mbudzi dzavho tharu kha nwedzi wa Luhuhi ṋaṅwaha. "Hezwi zwine zwa khou itea asi zwine muthu a nga zwi ṱalukanya, zwi khagala uri onoyo muthu u khou ṱoḓa u vhona ndo vhaisala. Ngavhe a tou dzi tswa fhedzi" vha ralo.
Vho-Manyekane vhari hezwi zwiito zwa mafobvu ndi zwiito zwa vhutshivha. "Musi munwe muthu a tshi bvelela, vhanwe vha toḓa u mu wisela fhasi."
Muambeli wa mapholisa Vho-Brig Motlafela Mojapelo vho khwaṱhisedza uri milandu yo hweleliwaho ya u tswiwa ha zwifuwo kusini kwa Ha-Kutama i khou enda ḓuvha linwe na linwe. Ahuna muthu o fariwaho kha milandu iyi u swika zwa zwino.