Micheal na Thivhudzwi vho tshata nga murahu ha minwaha ya fumbili rathi.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Vhafunani Vho-Micheal Gumula na Vho-Thivhudziwi Mudau vho malana nga mutshato nga murahu ha minwaha ya fumbili rathi. Vho-Gumula ndi murangaphanḓa wa kusi kwa Itsani. U rangani hau malana naṅwaha, vhafunani avha vho lingedza u tshata luvhili fhedzi zwa bala sa izwi vhovha vha tshi ṱangana na zwikhukhulisi. Ḽovha dakalo ḽihulu kha vhafunani avha vha tshi fulufhedzisana nau tendelana u funana nau dzula zwavhuḓi vhoṱhe phanḓa ha tshitshavha.

Vha tshi lingedza u tshata lwa u thoma nga ṅwaha wa fumi ṱahe fuṱahe-malo, Vho-Mudau vhovha vhe muimana, zwezwo zwa kombetshedza uri vha litsha mutshato sa izwi kereke yavho isa tendelani na mutshato wa muimana. Vha lingedza hafhu nga ṅwedzi wa Nyendavhusiki mahola, fhedzi vha bvelelwa nga tshiwo tsha lufu lwa shaka ḽa Vho-Mudau ḽa tsini-tsini ea lovha kha khombo ya moḓoro. Tshiwo itsho tsho vha kombetshedza uri zwishumiswa zwoṱhe zwi fanaho na zwiḽiwa zwe zwavha zwo vhetshelwa mutshato zwi shumiswe kha lufu. Naho vho ṱangana na zwikhukhulisi izwi zwoṱhe, vha takala uri ḓuvha ḽavho ḽa mutshato ḽo vhuya ḽa swika.

Fhaḽa Shayandima ho ṱoḓou ima tsere nga Mugivhela wa ḽa fumi sumbe Fulwi, musi vhadzulapo na vhahulwane vha vhupo uho vha tshi ṱangana u ḓou pembelela na vha miṱa ya ha Mudau na Gumula. Mutshato uyu wo itea kerekeni ya Shayandima Apostolic Unity nga Vho Bishopho Vho-Obert Ramabulana.

Mutshatoni uyo, zwiambi zwo hulisa vhafunani avha. Vhakoma Vho-Sibuda Budeli, muimeleli wa khoro ya musanda ya Tshisahulu, vho hulisa Vho-Gumula nga nḓila ine vha shela mulenzhe kha u bveledzisa muvhundu wa Shayandima na Tshisahulu, hune vha shuma kha vho ḓi imisela kha mihasho minzhi.

Muimeleli wa wa kereke ya Shayandima Apostolic Unity, vho sumbedzisa u takala ha tshivhidzo nga ha mutshato uyu. Vha tamela na vhafunani avha mashudu mavhuya.

Kha tshipitshi tsha Vho-Gumula, vhari vho lindela ḓuvha iḽi lwa minwaha ya fumbili rathi. Vha dovha hafhu vha tenda uri ndi tshifhinga tsha mudzimu hone tsho swika nga tshifhinga tshavhuḓi.