Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
U shandukiswa ha milayo ya thengiso ya mahalwa vunḓuni ḽa Limpopo zwo sia huna khuḓano tshitshavhani. Vhoramabindu vha mahalwa na vhoramuzika vha khou hanedzana na milayo iyo, vhari u rengiswa lwa tshifhingta itsho tshi swa tsho khethwaho zwi vha kwama nga nḓila isi yavhuḓi. Ngeno vha zwiimiswa zwa vhurereli na madzangano ane a lwa na u tambudzwa miṱani vha tshiri zwi ḓo engedza zwivhalo zwa milandu yau tambudzwa ine ya vhangwa nga u shumiswa ha mahalwa
Milayo iyi ya thengiso ya mahalwa, ine ya ḓo thoma u shumiswa nga ḽau thoma ḽa Ṱhangule, yo vhewa hu u itela u langa na u fhungudza u tambudzwa miṱani, u tambudzwa ha vhana, nau tshipwa ha vhathu. Vho MEC vha mveledziso ya ikonomi, vhupo, na vhuendela vhupo (LEDET), Vho-Rodgers Monama, vhari u shumisa ha mahalwa lwo kalulaho ndi tshone tshivhangi tsha vhunzhi ha zwiito zwisi zwavhuḓi zwine vhadzulapo vha ṱangana nazwo ḓuvha linwe na linwe.
Vho-Monama vhari muhasho u fanela u shela mulenzhe khau fhungudza nḓila dzine vhathu vha shumisa mahalwa na u tikedza nḓila dza u ṅwa vhathu vhe mahayani avho u fhira vhe nnḓa. "Ndi nga milayo iyi miswa, hune vha muhasho vha ḓo imisa mavhengele a mahalwa u rengisa halwa u bva nga awara ya vhu fumimbili nga maḓuvha ane ha rengiswa mahalwa," vha amba.
Milayo miswa i tendela mavhengele a mahalwa u rengisa halwa u bva Musumbuluwo u swika Mugivhela nga awara ya vhuṱahe u swika awara ya vhumalo madekwana, hone nga Sondaha, vha rengisa u bva nga awara ya vhuṱahe u swika awara ya vhuṱanu, vha tshi tendelwa u ṅwa vhe henefho. Vha mavhengele au ḽela ane a rengisa halwa, vho tendelwa u rengia halwa u swika nga awara ya vhufumimbili, hune kale vhovha vha tshi tendelwa u rengisa u swika awara ya vhufumimbili maḓautsha.
"Sondaha ndi ḓuvha la kereke, hune vhathu vha vha vha khou shumela uvha tsini na Mudzimu. Milayo iyi yau rengisa mahalwa nga Sondaha zwi ḓo ṱuwisa vhathu tsini na mudzimu. Ri fanela u humbula uri halwa hovha ho dzivhelwa u rengiswa nga Sondaha hu nḓila yauri vhathu vha sendele tsini na mudzimu," hu amba vhafunzi vha Vho-Jabulane Monegi, vha tshivhidzo tsha African Methodist Episcopal ire Shayandima.
Vha nyanḓadza mafhungo ya Limpopo Mirror vho kwama vhunzhi ha vharangaphanḓa vha zwivhidzo vhe vhari vhovha vha sa ḓivhi nga ha milayo iyi miswa, hone avha ngo kwamiwa hu tshi ṱoḓiwa vhupfiwa havho nga milayo iyi. Foramu ya vhafunzi vha vhupo ha Vhembe vhari vha ḓo ambedzana kha uri vha fhindula hani milayo iyi sa izwi vhovha vha songo vhudziswa vhupfiwa havho.
Mulangi wa Ṱhohoyanḓou Victim Empowerment Programme (TVEP), Vho-Fhatuwani Manthada, vhari avha vhoni uri milayo iyi i ḓo thusa khau fhungudza milandu ine vha ṱangana nayo ḓuvha linwe na linwe. Vhari u rengiswa ha mahalwa nga Sondaha zwi ḓo engedza kha milandu ine yo no ḓivha hone. "Sa dzangano, ri humbela uri vha tshiimiswa vha sedzuluse tsheo yavho," vha amba.
Muambeli wa LEDET, Vho-Zaid Kalla, vho hanedza uri a hungo kwamiwa vhafaramikovhe hu saathu u khwaṱhisedzwa milayo iyi. "Vha muhasho vho fara nyambedzano na tshitshavha u pfa vhupfiwa havho. Ho humbelwa na vhupfiwa ha vhafaramikovhe, hu tshi katelwa na vharangaphanḓa vha zwivhidzo, hu sivhe na vhane vha hanedza milayo iyi," vha amba.
Vho-Sipho Mashabela, muambeli wa tshiimiswa tsha vhaimbi, vhari avha tendelani na milayo iyi. Uya ngavho, i do vha humisela murahu sa musi huna u ṱaha ha dwadze la Covid-19, hune vha ḓo balelwa u wana masheleni a u ḓi unḓa. "Vhoramuzika vhashu vha wana masheleni nga u mvumvusa vhathu vhe fhethu hune ha rengiswa mahalwa, hone na tshilimo tsho swika hune havha na vhuṱambo vhunzhi, vha ḓo fanela u wana masheleni. Milayo iyi i ḓo vha konḓisela matshilo sa izwi hu nga sivhe na masheleni ane vha a wana," vha amba.