Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Mulandu wa u vhulaha munna wa minwaha ya fumbili-ṱhanu u bva fhaḽa Tshino kha vhupo ha Vuwani wo shanduka vhukuma nga murahu ha musi miraḓo miraru yadzangano lavhadzulapo la( SANCO) vha henefho vho farwa malugana na lufu lwawe.
Mupondwa, we a ṱalulwa sa Gumani Lordwick Mironga, o wanala o lovha nga khaladzi awe nga Swondaha, ḽa 29 Fulwi, nga awara ya 10:00. U ya nga mivhigo ye a i wana, o vha o no vhuya a pomokwa uri o thivhela khii dza nnḓu ya muhura, nahone hu pfi vharangaphanḓa vha tshitshavha vho vha vha tshi khou mu ṱoḓa.
Muambeli wa Vhembe SAPS Vho W/O Vuledzani Dathi vho khwathisedza uri ho vulwa mulandu wa u vhulaha. "Ro ḓivhadzwa nga ha fhethu he ha itea zwithu nahone ra wana munna a sa tsha tshila. Tshumelo dza shishi dzo ḓivhadza uri o lovha musi vha tshi swika," vha ralo Vho Dathi. Tsedzuluso dza u thoma dzo bvisela khagala zwiga zwa u huvhala kha muvhili.
Nga murahu ha ṱhoḓisiso dzo engedzeaho, mapholisa a Vuwani vho fara vhahumbulelwa vhararu nga Ḽavhuṋa, ḽa 3 Fulwi: Vho Ambani Matumba, Vho Mpho Rakgogo na Vho Bishop Tshishonga, miraḓo yoṱhe ya kha davhi la SANCO fhala Hanesengani. Vhahumbulelwa vha miṅwaha ya vhukati ha 38 na 48, vho thoma u ḓivhonadza khothe nga Ḽavhuṱanu, ḽa 4 Fulwana. Mulandu wavho wo fhiriselwa phanḓa kha Musumbuluwo, ḽa 7 Fulwana, u itela u ita phurofaili na khumbelo ya beili ine ya nga vha hone.
Nga Musumbuluwo, mulandu wo dzhia tshifhinga tshiswa musi maḓana a vhadzulapo vha tshi matsha vha tshi ya Khothe ya Madzhisiṱaraṱa ya Vuwani, vha tshi ṱoḓa uri vhahumbulelwa vha vhofhololwe. Vhasumbedzi vho amba uri vhararu a vha na mulandu nahone vho vha vho tou ṱaluswaho sa vhare na mulandu ngeno husi vhone.
Murangaphanḓa wa tshitshavha Vho Alex Ndou vho ri: "Havha vhanna vho farwa vha si na tshithu tshe vha ita. "Ri na mafhungo a uri mufu o rwiwa nga tshigwada tsha vhanna kha bakkie vhe vha vha vha tshi khou ṱoḓa founu na muambi o tswiwaho. Vhanna vhashu vho mu phulusa vhukuma. Vhaṅwe vhathu vha khou lingedza u ri nyadza nga ṅwambo wa mushumo wavhuḓi une ra khou u ita tshitshavhani. Ri a zwi ḓivha uri ngoho i ḓo bvelela khothe."
Mulandu wovha wo fhiriselwa phanḓa nga ḽa 11 Fulwana u itela khumbelo ya beili ya fomala.