Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Vhadzulapo vha kusi kwa Ha-Bungeni na vha vhupo ha tsini vho sala vho vhaisala vhukuma musi mavemu asa ḓivhei a tshi tshinyadza mitshini ya masheleni lwa vhuvhili kha ṅwedzi muthihi.
Kha mavhengele tserekani a Saseki vhege tharu dzo fhiraho, mutshini wa masheleni wa Capitec wo tshinyadzwa nga mavemu. Ovha masinḓambilu kha vhadzulapo vha Ha-Bungeni nga matsheloni a Sondaha, nga ḽa fumiina Shundunthule, mavemu o dovha hafhu a tshinyadza mitshini ya masheleni mivhili, zwa zwino vhadzulapo a vhana mitshini ya masheleni.
Muambeli wa mapholisa a vunḓu ḽa Limpopo, Lt Col Vho-Malesela Ledwaba vho khwaṱhisedza tshiwo itsho. "Vhanna vhaṱanu vho vhandamela vhalindi vha tsireledzo vha mavhengele tserekani a Saseki Ha-Njhakanjhaka ngei Ha-Bungeni, vhavha valela vha tshinyadza mitshini iyo. Zwa zwino azwi ḓivhei arali mavemu o dzhia masheleni kha mitshini iyo, fhedzi vhahumbulelwa vhovha vha sina zwiendedzi vha tshi ṱuwa, hone ahuna u thuntshwa ho iteaho," vha amba.
U tshinyadzwa ha mitshini iyo zwo sia vhadzulapo vho vhaisala. Sa izwi vhovha vhe na mitshini ya masheleni tsini, vhadzulapo vhovha vho leludzelwa kha shumisa masheleni manzhi uya ḓoroboni nga zwifhinga zwine vha ṱoḓa tshumelo ya masheleni.
Vho-Makhayisani Mabunda, mudzulatshidulo wa khoro ya vhuhosi ha Ha-Bungeni, vhari u tshinyadzwa uhu ho sia vhadzulapo vho tshuwa. "Rovha ri sathu hangwa nga u tshinyadzwa ha mitshini vhege tharu dzo fhiraho, zwa zwino vho tshinyadza futhi.Ri touvha vhupo vhu shayaho tshumelo nnzhi, ri touvha na mitshini ya masheleni ine zwino yo tshinyadzwa nga mavemu ayo. Vhushai ha vhupo hashu ndi vhune ho andesa, hone vhadzulapo vha shumisa magavhelo uri vha kone u ya ḓoroboni.Ri pfa zwi tshi ri vhaisa vhukuma hone ri fulufhela uri mapholisa vha ḓo shuma mushumo wavho vha fara mavemu nau thivhela vhugevhenga vhu fanaho na uhu," vha amba.
Vho-Ledwaba vhari ho vulwa mulandu wau ṱoḓa mavemu aya, vhane vha khaḓi tshimbila afho nnḓa. "Sa mapholisa, ri humbela muthu ane avha na vhuṱanzi vhune vhu nga thusa kha u fara vhahumbulelwa avha uri vha kwame mukapuṱeni Vho-Mabunda kha 082 565 7901, kana vhaye kha tshiṱitshi tsha tsini navho. Vha nga founela nomboro dza crime stop 08600 10111 kana vha vhiga kha MySAPSApp. Ṱhoḓisiso dzi khou bvela phanḓa," vha amba.