Tshiṱori nga: Maanda Bele. Ṱhalutshedzo nga: Khathutshelo Raliphaswa.
Vhadzulapo vha kusi kwa Vhurivhuri, nnda ha Ṱhohoyanḓou, vho vuswa nga mafhunga asi avhuḓi na luthihi nga ḽa fumbili-malo vha tshi wana hofa mmbwa dzi fhiraho mahumi mavhili hune vha humbula uri dzo tou shelelwa mulimo sa izwi ufa hadzo zwi tshi vhilaedzisa.
Uya nga ha Vhakoma Joseph Mmbengwa, mmbwa idzi dzovha dzo shelelwa vhulimo nga madekwana a ḓuvha ḽa fumbili-sumbe. Vhari vhadzulapo vho akhamala nga tshiwo itshi, hone vho sala na dzi mbudziso nnzhi. "Ndi nnyi ane anga tou shelela dzi mmbwa mulimo? Ari khou ḓivha muthu ozwi itaho, fhedzi ria ofha uri muthu uyu kana vhathu avha vha nga swika kha u shelela mulimo rine vhathu. A ri athu u vhiga mulandu uyu kha mapholisa, ri ṱoḓa u thoma ra dzula sa vhadzulapo ra lingedza u tandulula thaidzo iyi," vha amba.
Rabulasi wa kusi uko, Vho Itani Makuya, vho ṱahisa u vhaisala havho sa izwi mmbwa yavho yofa kha tshiwo itsho. Vhari: "vhanwe vhathu a vha na dzi mbilu. Mmbwa dzo wanwa dzofa dzi badani, dzinwe dzi nga ngomu miḓini ya vhane vhadzo. Hone azwi thomi u itea zwiito zwo raliho, fhedzi avha anzeli u vhulaha mmbwa dza tshivhalo tshinzhi ngaurali nga khathihi. Minwaha miraru yo fhiraho, ho vhulawa khuhu dzanga dza fusumbe dza tshirema na mmbwa. Zwa zwino ari khou ṱoḓa u vhigela mapholisa. Muiti wazwo ri amu ḓivha fhedzi a rina vhuṱanzi ho khwaṱhaho, ri vhilaela uri hu ḓopfi ri khou tou sumba vhathu nga minwe."
Vho Makuya vhari vhovha vha tshi takalela mmbwa yavho vhukuma. "Mmbwa yanga yovha i tshi ri linda nga nḓila dzo fhambanaho, hone ri tshi i dzhia sa muraḓo wa muṱa. Zwa zwino ri pfa ro xelelwa nga muraḓo wa muṱa," vha amba.
Vho Lawrence Khodobo, ṱholi khulwane kha SPCA ya Tshitandani, vho eletshedza vhadzulapo vha Vhurivhuri uri vhaye mapholisani u vula mulandu. "Vhafanela u isa na mmbwa idzi kha madokotela a zwifuwo uri vha kone u ṱola zwo laho mmbwa idzi. Ndi hone mapholisa vha tshi ḓo kona u bvela phanḓa na tsedzuluso dzavho. U shelela zwifuwo mulimo kana u zwi tambudza zwazwo ndi mulandu phanḓa ha mulayo. Muthu anga farwa a dzula khothoni lwa minwedzi ya fumi-na-mbili kana a badela masheleni a ndaṱiso a linganaho zwigidi zwa funṋa," vha amba.