Tshiṱori nga: Maanda Bele. Ṱhalutshedzo nga: Khathutshelo Raliphaswa.
Musidzana wa minwaha ya fumisumbe o farwa nga Mugivhela, 15 Lambamai, ngei kha kusi kwa Ha-Mphego nge a vhulaya ṅwana wawe wa mutukana wa minwaha mivhili a posa tshitumbu dindini ḽa bunga.
Muambeli wa mapholisa a Limpopo, Lt Col Malesela Ledwaba, vho khwaṱhisedza u farwa uhu. "Mapholisa vha Ṱhohoyandou vho vula mulandu wa bulayo une u khou ṱoḓuluswa nga vha FCS (yuniti yau tambudzana miṱani, tsireledzo ya vhana na u tambudzwa lwa vhudzekani), mulandu uyu wo newa yuniti iyi zwi tshi tevhela uri ndi mulandu u shushaho hone vhane vha kwamea ngawo ndi vhaṱuku," vha amba vho-Ledwaba.
Uya nga ane a ḓivha nga tshiwo itshi we asi ṱoḓe u bulwa dzina, musidzana uyu ovha muimana ana minwaha ya fumiina, aya u dzula na khotsi a ṅwana musi a tshi bebwa. "U humela hawe hayani zwo vhanga mathada manzhi kha vhushaka havho. Sa izwi ṅwana ovha atshi dzula na khotsi awe, oya amu dzhia uri avhe a nae nga maḓuvha u awela musi zwikolo zwo vala nga Ṱhafamuhwe. Khotsi a tshi tevhela ṅwana, musidzana omu zwifhela uri ṅwana una mme awe, khotsi ori u tevhela ṅwana ha makhulu awe a wana ṅwana a siho afho. A dovha hafhu ari u vunḓuni ḽa Gauteng na mashaka, zwe zwa sia khotsi a ṅwana a tshi founela mapholisa, musidzana uyu o ḓou thoma u ḓi bula uri o vhulaya ṅwana amu posa dindini ḽa bunga kha vhengele ḽa zwishumiswa zwa u fhaṱa kha kusi kwa Ha-Mphego," a amba.
Hu pfala uri musidzana uyu zwa zwino u muimana wa minwedzi ya malo nga munwe muṱhannga, ane hu humbulelwa uri ndi ene omu ṱuṱuwedzaho uri a vhulaye ṅwana wawe sa izwi ori ha ṱoḓi uyu ṅwana wawe wa minwaha mivhili, ngazwo o mu vhulaya.
Musidzana uyu o ṅwala kha siatari ḽawe ḽa zwileludzi zwa vhudavhidzani, Facebook: Ndia zwi ḓivha uri nyimele iyi i ḓovha miḓai na zwikoloni fhedzi ahuna zwine nda nga ita ngazwo. Ni ḓo nkhumbula. Ndi humbela uri ni nkhangwele kha zwe nda ita kha mutukana wanga, ndi pfa vhuṱungu. Ndo vhulaya ṅwana ngau ṱoḓa u takadza muthu ane hana ndavha na nne.
Muimeleli wa davhi ḽa SANCO kha honoho vhupo, Vho-Azwitamisi Masala, vhari tshiwo itshi tsho mangadza vhathu kha kusi uku. "Ro shona hone ro bvulea tshirunzi tsha kusi. Ari ḓivhi ri ite mini kana ri ambe afhio, fhedzi ahuna ane ovha a tshi nga humbulela uri zwithu zwo raliho zwi nga itea kha kusi kwashu. Zwa zwino ri lila na vha muṱa kha tshifhinga itshi tshi konḓaho hone ri khou vha thusa nga nḓila dzine ra kona ngadzo," Vho-Masala vha amba.
Vho-Messie Raphalalani, mutumbuli wa tshiimiswa Stop the Spot, tshine tsha ambela nau imelela pfanelo dza vhana na vhafumakadzi, vhari tshiwo itshi tshi touvha makhaula mbilu kha vhanzhi. "Ri tshiimiswa tsho ḓi nekedzelaho khau ṱhogomela vhuvha ha vhadzulapo vhoṱhe, ro kwamea nga tshiwo itshi na zwivhangi zwo ṱuṱuwedzaho tshiwo itshi. "Nyimele dzi fanaho na mutakalo wa muhumbulo, vhushaka na nḓila dzine vhabebi vha alusa vhana ngayo dzia konḓa hone dzi fanela u tandululwa nga nḓila ya vhuronwane. Vhadzulapo vha hwelelwa uri vha farisane kha dzi thaidzo dzo raliho uri ri ḓo konou dzi tandulula nga ṱhalukanyo nthihi. Ndi zwa vhuṱhogwa uri ri ṱalukanye vhane vha ṱangana na thaidzo dzo raliho uri vha si pfe vho laṱwa kana vha sina vhushavhelo. Nyimele dzo raliho ari fanelwi uri ri haṱule muthu fhedzi ri fanela u nea thikhedzo," vha amba.