Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Mme a Rotondwa Ramaloko we a thuntshwa a lovha hu tshi ṱangulwa mavhengele tserekano a Elim vha khou huwelela vha mavhengele tserekano uri vha vha lilise kha u lovha ha ṅwana wavho sa izwi o lovha khaluhura lwamavhengele avho. Rotondwa we a vha e na minwaha ya fumi-rathi a bvaho kusini kwa Mukondeni o thuntshwa a lovha nga ḽa malo Shundunthule ṅwaha uno kha muthuntshano wa musi mavemu vha tshi khou ṱangula fhethu afho. Ovha e na mme avhe, vharathu vhawe na khotsi awe vha si vha malofhani nga tshifhinga itsho.
Mme avhe, Vho Jennifer Mpakanyani, vho vhudza vha nyanḓadza mafhungo ya Limpopo Mirror uri, zwe vha liliswa ngazwo ndi dennde ḽiṱuku ḽe ḽa ḓiswa nga vha butshara ya Roots nga murahu ha tshiwo itsho fhedzi. U bva kha vha mavhengele tserekano a Elim ahuna zwe vha liliswa ngazwo u swika zwino. "Mulanga mavhengele tserekano vho ḓa vha ri fulufhedzisa uri vha ḓo ri thusa nga bogisi ḽa Rotondwa ḽa mbulungo na u renga kholoma ya mbulungo, fhedzi ahuna zwe zwa swika. Ndi khou ṱoḓa uri vha ri lilise sa izwi Rotondwa o lovha kha vhupo havho"
Vho Mpakanyani vhari vha khou ṱoḓa u vhona zwe zwa itea nga ḓuvha ḽe ṅwana wavho a lovha ngaḽo kha vhalangi vha dzi camera dza vhupo. "Ndi khou ṱoḓa u vhona uri ṅwana wanga o thuntshwa nga mavemu kana nga vhalindi vha tsireledzo naa, uri onoyo o zwi itaho a hweswe mulandu zwo fanelaho," vha amba.
Vhari zwine zwa vha vhaisa ndi uri vho vha vhe na fulufhelo ḽauri Rotondwa u ḓo kona u shandukisa nyimelo ya hayani havho. "Vhathu vho tshimbidza na mavharivhari a uri nṋe ndovha ndo mu ṋea ṱhingikhwala yanga uri a kanḓise vidio ya zwe zwavha zwi khou itea, zwe zwa sia o thuntshiwa, zwine zwa mmbaisa sa mubebi o lovhelwaho nga ṅwana," vha engedza.
Mulangi wa moḽo wa Elim, Vho Mpho Madadzhe, vho hanedza maambiwa ayo, vhari vha muṱa vho ṋeiwa thikhedzo yo fhelelaho hone yo teaho nga tshifhinga tsha mbulungo. "Ro thusa vha muṱa nga u fhaṱa vhulalo ha Rotondwa, hone kha u ṱoḓa u liliswa, ro ḓi imisela u vha lilisa nga hune ra nga kona," vha amba.
Musi vha tshi vhudzisiwa uri Vho Mpakanyani vha ḓo ṋeiwa thendelo ya u vhona zwe zwa itea nga iḽo ḓuvha kha dzi camera, Vho Madadzhe vhari: "Zwo bvelela nga musi wa u sielisana ha muḓagasi, zwine zwa amba uri ari koni u vhona zwe zwa bvelela ngauri nḓisedzo ya nethiweke yovha i fhasi."
Hovha ho dzudzanywa muṱangano vhukati ha vha muṱa na vhulangi ha Elim nga a fumbili Khubvumedzi. Thimu ya Elim vho ḓou dalela vha muṱa nga murahu ha nyambedzano na Vho Madadzhe na vha gurannḓa, vho humbela vha muṱa uri vha ṅwale zwine vha ṱoḓa u liliswa ngazwo, zwine zwa ḓo fhiriselwa kha vhahulwane. Vha muṱa vho ita ngauralo vha isa ḽiṅwalo ḽavho nga ḽa fumbili-mbili Khubvumedzi.