Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vha muṱa wa ha Maiwashe vha khou ṱoḓa dzi phindulo kha uri ho itea mini kha Mpho Maiwashe, we a wanala o lovha, zwine ha humbulelwa uri o fema gese ubva kha dzhenereitha musi a mushumoni tshiṱitshini tsha zwivhaswa tsha Sweetwaters kha kusi kwa Mpheni.
Maiwashe o waniwa nga vhashumi vha tshṱitshi tsha zwivhaswa kha inwe ya dziphera hanefho nga matsheloni a Lavhuraru, ḽa fumi Shundunthule. Hu humbulelwa uri tshivhangi tsha lufu ulu ndi u fema muya wa dzhenereitha, ine ya shumiswa nga tshifhinga tshau sielisana ha muḓagasi.
Malume a Maiwashe Vho- Khathutshelo Nemagovhani vhari muṱa wo xelelwa hone vha na dzi mbilaelo nga zwe zwa itea. "Zwine zwa ri vhilaedzisa ndi uri nwana washu ovha a khou shuma e eṱhe vhusiku hoṱhe. Ri fulufhela uri mulayo udo dzhenelela uri ri wane vhulamukanyi," vha amba.
Mune wa tshiṱitshiishi Vho-Jerald Marallich, vhari Maiwashe o wanala kha phera ye yavha ina dzhenereitha, hone yo fungiwa. "Ndi zwine ra ḓivha kha tshifhinga tsha zwino. O wanala tshiṱitshini e eṱhe ngauri ovha a khou shuma diso ḽawe ḽa vhusiku," vha amba.
Vho-Marallich vho sumbedza u kwamea ngau vhaisala kha tshiwo itshi sa izwi vho xelelwa nga munwe wa vhashumi vhavho.
Munwaleli wa SANCO kha Ward 15 ya Mpheni, Vho-Raymond Matsapula, vhari vha vhona mulandu nḓila dzau shuma kha tshiṱitshi itshi. "Mbilaelo yashu sa vhadzulapo ndi uri ndi ngani vha tshi vhea muthu muthihi khau langa tshiṱitshi tshoṱhe e eṱhe vhusiku hoṱhe. Kha tshifhinga tshine rina khaedu ya u sielisana ha muḓagasi, vhashumi vhavha vho tsireledzea na?," vha amba.
Muambeli wa mapholisa, Sgt Vho-Tshifhiwa Radzilani, vho khwaṱhisedza tshiwo itshi. "Muṱhannga wa minwaha ya fumbili malo o wanala o lovha kha phera ire na dzhenereitha yo fungiwaho. Ahuna mafuvhalo a vhonalaho, ri khou ṱoḓisisa mulandu uyu uri ho itea mini kha Maiwashe," vha amba.