Ṱhalutshedzo nga Khathutshelo Raliphaswa.
Muṱa wa mutshudeni wa Yunivesithi ya Venda (Univen) we a wanala o lovha lufherani lwawe mafheloni a vhege u kha ḓi vha wo mangadzwa nga lufu lwawe nahone u khou ṱoḓa phindulo nga maanḓa u itela u tendelana na zwe zwa itea.
Vhutshilo Munyai, u bva Halambani Nzanwe nnḓa ha Thohoyandou, o vha a tshi dzula kha fhethu ho tendelwaho ha Univen ho tendelwaho nga nnḓa ha khamphasi ngei Golgotha. O fhedzisela u vhonala a tshi khou tshila nga Ḽavhuṋa, ḽa 27 Ṱhafamuhwe, nga murahu ha u ya kha holoni yau funzelwa hone nga 16:30.
Nga ṅwambo wa u vhilaela nga ha u sa vha hone hawe na uri o vha a sa athu vhonwa lwa maḓuvha mavhili, mulindi wa tsireledzo o fhaṱuwaho o dzhia tsheo ya u ṱola phera yawe nga Mugivhela nga masiari. U wana vothi ḽo vulea, mulindi o dzhena nahone a ṱanganedzwa nga u vhona muvhili wa Munyai u si na vhutshilo kha mmbete.
Zwiimo zwo tangaho lufu lwawe zwi kha di vha tshiphiri sa vhunga hu si na muthu ane a divha zwe zwa itea musi a sa athu lovha.
Muambeli wa muta Vho Talifhani Netshitavhadulu vhari muta wo divhadzwa nga ha u lovha hawe nga madekwana nga 19:00 nga mugivhela wonoyo. "Ṅwana washu o vha a tshi khou guda Univen nahone a tshi dzula vhudzuloni ha Golgotha. Ro vha ro tshuwa musi vhurumelwa vhu bvaho yunivesithi vhu tshi swika hayani hashu u itela u ḓivhadza mafhungo a ṱungufhadzaho," vha amba.
Vho Ntshitavhadulu vho engedza nga uri, zwe zwa vha mangadza ndi uri tshitumbu tsho vha tsho no dzhiiwa vha sa athu wana tshikhala tsha u zwi vhona. Musi vha tshi vhudzisa zwenezwi, vho vhudzwa uri tshitumbu tsho bviswa u itela u thivhela vhaṅwe vhagudiswa uri vha si ṱungufhale.
U bva tsheetsho muṱa wo humbela zwifanyiso zwa CCTV u itela u lingedza u vhona uri ho itea mini. "Musi vhaṅwe miraḓo ya muṱa vha tshi ya pherani yawe, vho wana malofha manzhi vhukuma kha thundu dzawe. O vha e na tshilonda kha tshifhaṱuwo tshawe, nahone zwiambaro zwawe na malagani au fuka zwo vha zwo ṱanzwiwa nga malofha," vha ralo.
Vho Ntshitavhadulu vhari nyimele dzo tangaho lufu lwawe dzo vha sia vha na mbudziso nnzhi dzi sa fhindulei. "Ri tshi sedza kha nḓila ye avha e ngayo, ri tenda nga maanḓa uri o ṱhaselwa musi a sa athu lovha. Muvhili wawe wo vha wo no vha kha tshiimo tsha u tshinyala," vha engedza.
Vho dovha vha humbela thuso ya u vhulunga sa izwi muṱa u tshi khou kundelwa nga zwa masheleni.
"Vhutshilo o vha e ene muunḓi hayani hashu. O vha a tshi ita na u shumisa tshipiḓa tsha masheleni awe a NSFAS, e a vha o itelwa u mu ṱhogomela, u itela u tikedza mme awe. Tshipiḓa tshivhi vhukuma ndi tsha uri mulandu a wo ngo ṅwaliswa sa vhupondi, naho ho vha hu na malofha kamarani yawe," vho ralo.
Muambeli wa Univen Vho Dokotela Takalani Dzaga vho amba uri nga murahu ha u ḓivhadzwa nga ha tshiwo itshi, vhaofisiri vha yunivesithi vho ya pherani ya Vhutshilo u ṱola.
"Nga u ṱavhanya ro rumela vhaofisiri uri vha ḓivhadze nga nḓila ya tshiofisi muṱa nga ha u fhira hawe. Tshiwo tsho vha tsho sala kha zwanḓani zwa mapholisa, nahone musi vhurumelwa vhu tshi kha ḓi vha hayani ha muṱa, ro vhudzwa uri tshitumbu tsho dzhiiwa nga mapholisa - tshithu tshe ra vha ri si na vhuvhusi hatsho. Ri khou shumisana na muṱa u itela u vhona uri mutshudeni washu u wana mushumo wa mbulungo u ṱhonifheaho," vha ralo.
Vho Dzaga vho engedza nga uri yunivesithi yo swikelela muṱa nahone ya ṱoḓa thuso ya ndugiselelo dza mbulungo. "Mashudu mavhuya, vhaṅwe vhathu vho no ḓi fulufhedzisa thikhedzo yavho yo fhelelaho malugana na u vhulunga na u ṋetshedza zwiḽiwa," vho ralo.
Muambeli wa SAPS Vhembe Vho W/O Vuledzani Dathi vhari lufu lwa muthannga lu fhasi ha thodisiso. Vho khwaṱhisedza uri muṱa wo vha u hone musi nga murahu ha lufu u tshi itwa nga ḽa 1 Lambamai. Kha tshiimo hetshi, mulandu a u khou ṱoḓisiswa wa vhupondi, fhedzi hezwi zwi nga shanduka, zwi tshi bva kha mvelelo dza nga murahu ha lufu na uri naa hedzi dzi sumbedza u shelwa tshanḓa hu konadzeaho.