Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Ḽidzhakanḓila kha muzika nauvhatshife, mubishopho Vho Roxley Masevhe a vha touvha muḓivhi kha u sika muzika wavhuḓi fhedzi; vha dovha hafhu vha vha muṅwali makone. Vho ṅwala bugu nga ha vhutshilo havho ine ya vhidzwa "Against All Odds, From Grass To Grace," ine yo rwelwa ṱari nga ḽa fumbili Khubvumedzi, vhupoi ha u awela ha Balmy ngei Dzwerani, nga ḓuvha iḽo hovha hu ḓuvha ḽa u pembela minwaha yavho ya 64.
Lwa minwaha ya fuiṅa-rathi vho no anḓadza aḽibamu dza fuina-ṱhanu na nyimbo dza maḓana maṅa. Vho Masevhe vha vhoniwa sa muṅwe wa vhoramuzika vha khwine u mona na shango. Kha muzika wavho ri vhala na nyimbo dza mulovha na mbamulovha dzine dzi kha ḓi mvumvusa vhathu khwine dzi fanaho na "Muṅwe u ḓo fhira" na "Vhuya Lufuno Lwa Kale" ri tshi tou vhala ṱhukhu kha nnzhi. Naho vho bvelela zwavhuḓi kha buḓo ḽavho ḽa muzika, ahuna zwinzhi zwine vhathu vha ḓivha nga ha muzika wavho. Bugu iyi i amba nga ha vhutshilo ha Vho Roxley Fhatuwani Masevhe, u bva vhuṱukuni havho u swika vha tshi aluwa. I dovha hafhu ya ri nea zwine a ri zwi ḓivhi nga ha vhutshilo havho he ha vha swikisa kha uvha muḓivhalea namusi.
Nga ṅwaha wa gidimbili fumi-rathi, vho pfufhiwa vhudokotela ha khuliso kha vhutsila nga vha gudedzi ḽa UNISA, zwi tshi tevhela u ṅwala havho muzika, u bveledza, na u sika muzika.
"Ndi bva kule kha lwendo lwanga lwa muzika, lune hovha hu songo leluwa hoṱhe. Ndo no ṱangana na zwikhukhulisi zwinzhi fhedzi nda kunda nga u hana u laṱa fulufhelo. Bugu iyi ye nda anḓadza ndi nga ha vhutshilo hanga, zwoṱhe zwavhuḓi na zwisi zwavhuḓi zwa lwendo lwa vhutshilo hanga. Vhanwe vha nga ṱuṱuwedzea, sa izwi i tshi amba nga ha u takuwa hanga u bva kha u savha na tshithu u swika kha u kona u swikelela zwithu zwine ndavha nazwo. Zwa zwino ndi a ḓivhea khwine. Ndo bva kha u dzula vhuponi ha mahayani ndi sina zwinwe, hone zwino ndo no swikelela u dzula ḓoroboni hune ndi na zwithu zwa khwine. Zwine ndavha zwone, zwo bva kha u konḓelela. Bugu yanga ndi ifa ḽanga ḽine ḽo ḓala ndayo dza vhutshilo kha vhane vha takalela u guda na u ṱanḓavhudza mihumbulo yavho uri vha be kha u tshila nga u ḓi pfela vhuṱungu, uri vha kone u kunda kha zwikhukhulisi zwine vha ṱangana nazwo."
Vho Masevhe vho alusa vhoramuzika vhanzhi kha lwendo lwa buḓo ḽavho, hu tshi katelwa Rofhiwa Manyaga na munnaavhane Vho Emmanuel Mamphogoro, vha vhanwe vhanzhi. Vha ḓo anḓadza bugu dzinwe mbili nga ṅwedzi wa Ḽara ṅwaha uno.