Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Mufunzi a ḓivheaho ane a anzela u fhandekanywa vhupfiwa ha vhathu, a bvaho Sibasa, Phathutshedzo Sikhubu, ane a ḓivhiwa khwine sa Muporofita Innocent Muritho kana "Ritha" vho dovha vha ḓiwana vhe kha sia ḽi si ḽone ḽa mulayo.
O farwa mafheloni a vhege malugana na zwine zwa khou humbulelwa zwa u tzhipa musidzanyana wa miṅwaha ya 14 ane ndi muraḓo wa kereke yawe.
Sikhubu, ane a vha muthomi mutumbuli wa Faith of Talitha Koum Ministry tshivhidzo tsha kereke tsha Sibasa, o ḓiṋekedza kha mapholisa tshiṱitshini tsha Mapholisa tsha Thohoyandou nga Swondaha, ya ḽa 19 Fulwana, nga murahu ha musi vhaofisiri vho no ya vha tshi khou mu ṱoḓa kerekeni yavho.
O vha o fhelekedzwa nga muimeleli wawe wa zwa mulayo, Adv Khuluso Negota. Nga murahu ha u hweswa mulandu lwa mulayo, o ḓou valelwa.
Muporofita Muritho o ḓi vhonadza lwa tshifhinganyana khothe ya Madzhisiṱaraṱa ya Thohoyandou nga Musumbuluwo, ḽa 21 Fulwana, he a hweswa mulandu wa u tzhipa lwa mulayo. Mulandu wo fhiriselwa phanḓa nga ḽa 30 Fulwana uri a ṱoliwe na ita khumbelo ya beili ine ya nga vha hone.
Vhatikedzi vhawe vhanzhi vho kuvhangana nga ngomu na nnḓa ha khothe u itela u sumbedza thikhedzo yavho.
U ya nga muambeli wa mapholisa Vho W/O Vuledzani Dathi, tshiwo itshi tsho itea nga dzi 9 Fulwana ofisini dza kereke.
"Hu khou pfi muporofita a ḓivheaho o founela musidzana wa miṅwaha ya 14 nahone a mu vhidza kerekeni. Musi a tshi swika, o laedzwa uri a khinele muṋango. Hu dovha ha humbulelwa uri muporofita o ḓibvula zwiambaro ene muṋe nahone a laedza uri musidzana a ite zwi fanaho, nga murahu ha zwenezwo a mu tzhipa luvhili. O mbo ḓi vhudzwa uri a songovhuya ezwi muntu nakha muthunamuthihi nahone a ye hayani," Vho Dathi vha uralo.
Hu pfi tshiwo itshi tsho bvelela nga ḽa 19 Fulwana musi musidzana a tshi vhonala o tsikeledzea. Musi a tshi vhudziswa nga muṱa wawe, o bvisela khagala u tambudzwa ha zwa vhudzekani hune ha khou humbulelwa. Nga murahu ha zwenezwo, mafhungo o mbo ḓi vhigwa kha mapholisa.
A si lwa u thoma Sikhubu a tshi sedzana na mavharivhari a fanaho na aya. O vha e na mulandu wa u tzhipa wo mu lindelaho ngei Cape Town nahone muṅwe u tshi katela mufumakadzi wa miṅwaha ya 20, hune ha pfi wo itea hayani hawe Tswinga nga 2024 nga tshifhinga tsha bepha ḽiṱuku.
Sikhubu o dzulela u ita ṱhoho dza mafhungo. Nga 2021, ṱhaselwa nga murahu ha u posa mutevhe wa vidio kha nyanḓadzamafhungo dza matshilisano dzau fhambana dzine vhovha vha tshi vhonala sa muthu o kambiwaho na u ḓihudza nga tshenzhemo dzavho dza zwa vhudzekani. Zwifanyiso izwo zwo ḓou sasaladzwa vhukuma nga miraḓo ya kereke yawe na tshitshavha nga u angaredza. Nga fhasi ha mutsiko wa u engedzea, Sikhubu o ḓou vhonala a bvisa pfarelo u ya kha tshitshavha.
Nga ṅwedzi wa Fulwana 2023, muporofita o dovha a kunga vhathu musi a tshi fara vhuṱambo ha ḓuvha ḽa mabebo ḽa vhuimo ha nṱha ha mmbwa yawe, Jackie, kerekeni yawe ngei Sibasa. Kholomo yo vhulawa nga vhaeni vhe vha ḓadza fhethu ha kereke.
Vhuḓipfi nnga ha u farwa hawe dzo ṱangana vhukuma. Vho Dokotela Alanamutwe Randitsheni vha Vhafunzi vha Vhembe vho sumbedza u pfela vhuṱungu mupondwa na muṱa wavho, vha tshi amba zwauri mavharivhari aya o vha kwama vhukuma.
"Vhafunzi vha fanela u vha tshedza kha zwitshavha zwashu. Hezwi zwi pennda dzina ḽivhi kha kereke, nahone ri ṱoḓa u zwi bvisela khagala uri hezwi a zwiho kha dzina ḽa dzangano ḽashu," vho ralo.