Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa
Vhadzulapo vha kusi kwa Mukondeni vho sala vho shushwa nga u pfa uri mudededzi a ḓivheaho o thuntshwa a vhulawa nga murahu ha u ṱangulwa tshiendedzi Hamagoro. Tshiwo itsho tsho bvelela nga Ḽavhuṋa ḽa fumbili-thihi Khubvumedzi. Tshiendedzi tshavho tsho waniwa fhethu ha vhukule ha khilomitha dza fuṱhanu yo fhiswa.
Mudededzi avho vho vhulawaho ndi Vho Robert Mudau vha minwaha ya fuṱhanu-rathi, vho vha vha tshi gudisa tshikoloni tsha nṱha tsha Tshiitwa vhuponi ha Hamashamba.
Muambeli wa mapholisa, Vho Lt Col Malesela Ledwaba vho khwaṱhisedza tshiwo itsho, hone ho vulwa milandu ya u vhulaha na u ṱangula tshiendedzi.
Vho Ledwaba vhari vha khou zwimana na vhaiti vhazwo uri vha kone u livhanywa na tshanḓa tsha mulayo. "Ri fulufhela uri ri ḓo phuletshedza kha mulandu uyu, hone vhaiti vhazwo a vha nga ḓo litshwa vha songo vhonana na tshanḓa tsha mulayo. Ri humbela na vhadzulapo uri vha ri thuse nga vhuṱanzi vhune vha vha naho vhune hanga thusa kha u fara vhaiti vhazwo," vha amba.
Khaladzi a Vho Mudau, Vho Lillian Mudau, vhari vho pfa vhuṱungu vhuhulu musi vha tshi pfa nga ha u vhulawa ha khaladzi avho vha vha funaho. "Ndo wana ṱhingo nga matsheloni ndi tshi ḓivhadzwa nga ha tshiwo itsho na u lovha ha khaladzi anga. Ndo tou pfa ndo shushwa na u tshuwa uri zwithu zwa u rali zwi itea hani?" vha amba.
Vho Lillian vhari khaladzi avho vhovha vhe muthu wa lufuno. "Khaladzi anga vhovha vhe muthu wa u luga na u ḓi ṱukufhadza, vha tshi funa na kereke. Vhovha vhe muthu ane a dzulela u sea na u takala na vhanwe vhathu. Ro xelelwa zwihulu nga u lovha havho. Ri ḓo dzulela u vha elelwa." vha engedza.
Vho Mudau vha ḓo vhulungwa Mukondeni nga Mugivhela wa ḽa furaru Khubvumedzi. Mushumo wa mbulungo u ḓo thoma nga awara ya vhurathi nga matsheloni.
Ane avha na vhuṱanzi ha tshiwo itshi a nga isa muvhigo tshiṱitshini tsha mapholisa tsha tsini, kana vha rumela mulaedza kha nomboro dza lushaka dza u thivhela dza 08600 10111 kana kha epe ya MySAPSApp.