Tshitori nga: Elmon Tshikhudo. Ṱhalutshedzo nga: Khathutshelo Raliphaswa.
Lovha ḓuvha ḽi lemelaho hone ḽi ṱungufhadzaho kha tshikolo tsha nṱha tsha Mphalaleni ngei Mutale kha mushumo wa tshihumbudzo wa munwe wa vhagudiswa nga Lavhuvhili, ḽa fumbili rathu Lambamai.
Mashudu Mathoho wa minwaha ya Fumi sumbe, mugudiswa wa murole wa vhufumi, o thulwa nga ṱiraka a nḓilani ya u bva tshikoloni nga ḽa fumi ṱahe Lambamai. Khombo iyi ye ya itea nga mathabama nga awara ya vhuna kha gondo ḽa nnyi na nnyi ḽa Maṱangari-Tshiombo yo sia mashaka, dzi ṱhama na vhagudiswa ngae vho vhaisala vhukuma.
Ṱiraka ḽovha ḽo no fhira he Mashudu ovha e hone musi ḽi tshi mu rwa a wela fhasi ha malinga aḽo a mbo lovha hanefho na zwenezwo, uvho ndi vhuṱanzi he ha newa vha gurannḓa ḽa Limpopo Mirror.
Muraḓo wa muṱa, Dokotela Cedrick Nnzekiseni Mathoho, vhe vha dalela fhethu he khombo ya itea, vhari khombo yo vha sia vho vhaisala vhukuma. "Sa muṱa ro vhaisala hone na mbilu dzashu dzo bilufhala. Ndi ḓi ḓivha ndi muthu o khwaṱhaho, fhedzi u vhona muvhili wawe kha tivha ḽa malofha zwo ntsia ndi tshi bvisa na miṱodzi. Nyimele heyi yo kwama na mutakalo wanga, zwihulu ndi tshi ḓivha na nzulele ya muṱa wa hawe. Ovhe e ene fulufhela ḽa muṱa wa hawe, zwino vho xelelwa nga fulufhelo ḽavho," vha amba.
Khombo iyo yo nkhumbudza khombo dzine dzo no ḓi itea kha gondo iḽi. "Huna vhagudiswa vhavhili vhane vho no ṱangana na khombo kha gondo iḽi, fhedzi ari ḓivhi nga ha mafuvhalo avho. Hu tea u lugiswa gondo iḽi uri khombo dzine dza itea khaḽo dzi fhele kana u fhungudzea. Ari tei u lindela dzinwe khombo dzi tshi itea dzine dza ḓo vhulaya vhathu kana uvha sia na mafuvhalo a tatisaho," vha engedza.
Mudzula tshidulo wa dzulo ḽau tikedza tshikolo (SGB), Vho-Thinawanga Maphagela, vhari sa vhabebi vha dzulela u fuluhela zwivhuya kha vhana vhavho, zwa zwino vho vhaisala nga khombo ye ya itea kha Mashudu. "Ri humbela tshumbelo ya khwine kha muvhuso, ri wane gondo ḽa khwine. Khombo iyi yovha i ngasi itee ngavhe gondo ḽovha ḽo aṱamaho," vha amba.
Muambeli pfareli wa mapholisaa Vhembe, Sedzheni Vuledzani Dathi, vho khwaṱhisedza khombo iyi. "Ho vulwa mulandu wau vhulaya u songoḓi imisela na thoḓisiso dza khombo iyi dzi khou bvela phanḓa, " vha amba.