Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Muhashi na uvha mubveledzi wambenyamushumo wa kale wa radio ya lushaka Phalaphala FM ,Lutendo Tshisikule o ṱhaphudza pfunzo dzawe hone zwa zwino o ṱanganedzwa sa ramulayo nga vha ndaulo ya khothe Afrika Tshipembe. Lutendo o shuma kha nḓowetshumo ya zwau hasha lwa minwaha i paḓaho fumi-ṱahe, hone o ḓou ṱutshela budo iḽo nga ṅwaha wa gidimbili fumbili-raru nga ṅwedzi wa Phando. O ṱhaphudza pfunzo dzawe dza LLB nga ṅwaha wa 2021 he a thoma na buḓo ḽawe sa muḓivhi wa zwa milayo.
Lutendo, oḓi dzulela vha na ndoro ya uvha muhashi wa radio. O bebwa a aluwa Shayandima, he a thoma pfunzo dzawe tshikoloni tsha fhasi tsha Lurenzheni a ḓou fhirela tshikoloni tsha nṱha tsha Ṱhohoyanḓou. Nga murahu hau ṱhaphudza murole wa vhufumi na vhuvhili, o ḓou thoma na digirii ya BA Communications ngei ya Yunivesithi ya Limpopo.
Muḽoro wa uvha kha khasho yo thoma nga ṅwaha wa 2004 musi a tshi thoma uvha muraḓo wa radio ya lushaka ya Phalaphala FM. O ḓou hasha mbekanyamushumo dzau fhambana e na ḽidzhakanḓila kha zwa khasho Vho Mpho "Jantiby" Nefale, vhe vhavha vha tshi mu vhidza nga ḽa "Flower Girl." O ḓou fhirela kha u bveledza mbekanyamushumo ya Nne na Vhone ine zwa zwino ya vhidzwa Mufaro ine ya hashiwa nga Rofhiwa Nethengwe u bva nga awara ya vhuṱahe u swika awara ya vhufumi na vhuvhili masiari, Musumbuluwo u swika Lavhuṱanu.
Lutendo o amba zwauri hango vuwa oḓi ḽora e kha nḓowetshumo ya zwa mulayo. Zwezwi a tshwi aluwa e kha khasho na zwine a tama vhutshiloni zwo dou shanduka nau aluwa. Nga murahu ha u ṱhaphudza pfunzo kha digirii ya zwa vhudavhidzani o ḓou ḓi ṅwalisa kha zwa LLB ngei UNISA. Ori a tshi ṱhaphudza digirii iyo a ḓi ṅwalisa u ṱanganedzwa nga vha ndaulo ya khothe khulwane. He a ḓou ṱanganedzwa ṅwaha uno nga ṅwedzi wa Fulwi.
"Kha lwendo lwanga, ndo ḓou limuwa zwauri hu na ṱhahelelo ya vhulamukanyi shangoni ḽashu hone vhunzhi ha vhathu avhana nḓivho nga ha nḓila dza mulayo," a amba.
"Kha nṋe tshipikwa tshau thoma ho ḓouvha u ṱhaphudza pfunzo dzanga kha zwa mulayo, hone ndi tshi dzulela u vhala vhusiku na masiari. Ndovha ndi tshi ḓi ṱuwa na bugu dzanga mushumoni he nda vhala nga zwifhinga zwau awela," a amba.
Lutendo u ṱoḓa uvha tsumbo kha ṱhama dzawe na vhaswa u mona na tshiṱiriki tsha Vhembe, a tshi vha sumbedza zwauri ubva vhuponi ha mahayani azwi faneli u thivhela muthu khau wedza ndoro dzawe. "Ndo aluwa zwithu zwi tshi konḓa kha muvhundu washu. Ndovha ndi tshi dzulela u ḓi vhudza zwauri ḽiṅwe ḓuvha ndi ḓo wedza ndoro dzanga, namusi ndi fhano," a amba.