Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa
Hovha na maipfi a ndiliso u bva kha dzi ṱhama, mashaka, vhashumisani na vhathetshelesi vha Phalaphala FM nga murahu ha uri sia shangoni ha muhashi kha Phalaphala FM, Rofhiwa "Rampsy" Rampfumedzi. Rampsy o lovhela vhuongeloni ha Mediclinic ngei Bulugwane nga Sondaha ya ḽa sumbe Phando, nga murahu ha u lwa na vhulwadze ha tshifhinga tshipfufhi, e na minwaha ya fuiṋa-na-thihi.
Rampsy o shuma kha mbekanyamushumo dzo fhambanaho lwa minwaha ya fumi-na-rathi e kha Phalaphala FM, hu tshi katelwa na uvha mudzudzanyi wa muzika. O hasha na mbekanyamushumo ya Vhugalatenga. Nga tshifhinga tsha musi a tshi lovha ovha a khou hasha kha mbekanyamushumo ya Zwamitambo ubva nga awara ya vhusumbe u swika ya malo Musumbuluwo u swika Lavhuṱanu.
Khotsimunene wawe Vho Balanganani Rampfumedzi, vhari u lovha ha Rampsy ndi ndozwo khulu kha muṱa wavho. "Zwia vhavha u xetshelwa nga muraḓo wa muṱa, fhedzi ri livhuwa mudzimu nga uvha tshipiḓa tsha vhutshilo hawe."
Vho Rampfumedzi vhari Rampsy ovha o kona o bveleza ndoro dzawe nga nḓila i ṱhonipheaho. "Ovha ono bveledza zwinzhi kha vhutshilo hawe. Ri ḓo dzulela umu humbula nga vhuthu hawe, lufuno, ṱhonifho, na u dzulela u setshelela. Naho huuri ria zwi ḓivha uri aringaḓo dovha hafhu ra mu vhona, ri khuthadzwa nga mishumo yawe ye a sia o ita. Mishumo yawe ye a shuma u alusa radio ido dzulela u ri ṱuṱuwedza u shuma roḓi imisela u itela uvha na matshilo avhuḓi," vha amba.
Mubveledzi wa mitambo kha Phalaphala FM, Vho Tshililo "Chiraiza" Nelufule, vho ṱuṱuwedza vhahashi vhaṱuku uri vha tevhedze maga e Rampsy a a sia. "Ovha muhashi wavhukoni lwa minwaha, a tshi hasha asa shavhi nau imelela muthu. Mishumo yawe ido dzulela u elelwa nga vhashumisani na vhathetshelesi vha Phalaphala FM," vha amba.
Mulanga dzi mbekanyamushumo kha Phalaphala FM, Vho Sharon Ravele, vho ṱahisa Rampsy sa muthu we a shumela u alusa na u ḓisa tshanduko tshitshavhani. "Ro xetshelwa vhukuma, hone ahungo xetshelwa tshiṱitshi tshashu fhedzi, ho xetshelwa na tshitshavha nga u angaredza. U xetshelwa nga muhashi a fanaho na Rampsy ndi ndozwo khulu. Ovhe e tsumbo kha vhaswa vhane vha takalela uvha vhahashi. Ri fulufhela nau rabela uri mudzimu vha ḓo kuvhatedza nau sendela tsini na vhane vho kwashekana nga uri sia shangoni ha Rampsy. O sia divhazwakale kha nḓowetshumo ya u hasha na u mbvumbvusa vhathu," vha amba.
Mushumo wa tshihumbudzo wo farelwa nḓuni dza khasho dza SABC Limpopo ngei Bulugwane mulovha nga Lavhuṋa (11 Phando). Mushumo wa mbulungo uḓo farelwa Bulugwane nga Mugivhela wa ḽa fumi-na-raru Phando. U ḓo vhulungiwa Tshakhuma Mibomoni.